Հայաստանի Կենտրոնական բանկն առաջարկում է կատարել Կուտակային կենսաթոշակների մասին օրենքի փոփոխություն՝ ֆոնդերի կառավարիչներին տնտեսության իրական հատվածում ներդրումներ կատարելու հնարավորություն տալով: Ֆոնդերի ավելի քան 60 տոկոսը ներդրված է հայաստանյան պետական պարտատոմսերում և ավանդներում, մնացածը` արտասահմանյան ընկերություններում: Քննարկման դրված նախագծի ընդունման դեպքում ֆոնդերի կառավարիչները բաժնային արժեթղթերում 25-ի փոխարեն կարող են կատարել 35 տոկոս ներդրում: Ընդհանուր ֆոնդից, որն այս պահին գերազանցում է 500 մլրդ դրամը, մինչև 10 տոկոսը կարող է ուղիղ ներդրում կատարվել մեր երկրի տնտեսության մեջ`տարբեր նախագծերում կամ ենթակառուցվածքներում: Կենտրոնական բանկը նաև առաջարկում է դադարեցնել կենսաթոշակային ֆոնդերի մասնակիցներին` իրենց հաշիվների մասին հաշվետվությունների տրամադրումը թղթային տարբերակով և դրանք ամբողջությամբ տրամադրել էլեկտրոնային:
