Ռուսաստանը կխստացնի ԵԱՏՄ ներմուծումների արժեքի վերահսկողությունը

Ներկայումս մաքսային արժեքը վերահսկվում է Դաշնային մաքսային ծառայության կողմից

Ռուսաստանի ֆինանսների նախարարությունը մշակել է մեխանիզմ, որը թույլ կտա վերահսկել ԵԱՏՄ երկրներից ներմուծվող ապրանքների արժեքը փոխադարձ առևտրի շրջանակում։

Ներկայումս մաքսային արժեքը վերահսկվում է Դաշնային մաքսային ծառայության կողմից, սակայն հարկային մարմինները նման գործիքակազմ չունեն, ինչը, ըստ մասնագետների, հնարավորություն է տալիս որոշ տնտեսվարողների նվազեցնել հարկային բազան։

«Առևտուր առանց սահմանների» կազմակերպության տվյալներով՝ այս բացը հաճախ օգտագործվում է անբարեխիղճ ձեռնարկատերերի կողմից։

Կառավարության օրենսդրական հանձնաժողովը արդեն հաստատել է համապատասխան փոփոխությունները։

Նոր կարգավորմամբ՝ հաջորդ տարվանից ԱԱՀ-ն հաշվարկելիս հիմք պետք է ընդունվի շուկայական արժեքին համապատասխան գինը, որը որոշվելու է համադրելի գործարքների հիման վրա։

Եթե հայտարարագրված գինը ցածր լինի սահմանված նվազագույնից, հարկային մարմինները կկարողանան այն ճշգրտել հարկային նպատակներով։

Փոփոխությունների նպատակը հարկային վարչարարության արդյունավետության բարձրացումն է և ստվերային սխեմաների սահմանափակումը։