Տնտեսագիտության ոլորտում 2022 թվականի Նոբելյան մրցանակը շնորհվել է ամերիկացիներ ԱՄՆ Դաշնային պահուստային համակարգի նախկին ղեկավար Բեն Բեռնանկեին, Դուգլաս Դայմոնդին եւ Ֆիլիպ Դիբվիգին ՙբանկերի եւ ֆինանսական ճգնաժամերի ուսումնասիրության համար՚: Այս գիտնականների հետազոտության կարեւոր եզրահանգումն է, թե ինչու է ծայրահեղ կարեւոր խուսափել բանկերի փլուզումից: Որպեսզի տնտեսությունն աշխատի, խնայողությունները պետք է ինչ-որ տեղ ներդրվեն: Սակայն այստեղ առաջանում է շահերի բախում ․ ավանդատուն ուզում է արագ հասանելիություն ստանալ իր փողին, մինչդեռ ձեռնարկությունը պետք է իմանա, որ իրեն չեն պարտադրի վաղաժամկետ մարել վարկը: Դայմոնդն ու Դիբվիգն իրենց հետազոտությունների մեջ ցույց են տալիս, թե ինչպես են բանկերը լուծում այդ խնդիրը: Միաժամանակ, նրանք ուշադրություն են հրավիրել բանկերի խոցելիության վրա այն դեպքում, եթե ճգնաժամի ֆոնին ավանդատուները ցանկանան միաժամանակ դուրս բերել իրենց միջոցները: Դրանց զանգվածային արտահոսքի հետեւանքով վարկային հաստատության փլուզումը կանխելու համար մասնագետներն առաջարկել են ավանդների ապահովագրում կառավարության կողմից:
