Երևանում իրականացվել է մոտ 13 հազար քմ փոսալցում

Երևանում ընթացող փոսալցման աշխատանքների շրջանակում իրականացվել է մոտ 13 հազար քառակուսի մետր ասֆալտբետոնե ծածկույթ։

Այս մասին փետրվարի 23-ի գործակարգավարական նիստում տեղեկացրել է Երևանի քաղաքապետարանի Շինարարության և բարեկարգման վարչության պետի ժամանակավոր պաշտոնակատար Անդրանիկ Թևոսյանը։

Նրա խոսքով՝ ժամանակավոր տեղային լուծում է տրվել նաև մոտ 320 փոսերի դեպքում, որոնք գույքագրված են՝ հետագայում հիմնարար աշխատանքներ իրականացնելու նպատակով։

Երևանի քաղաքապետ Տիգրան Ավինյանը դրական է գնահատել աշխատանքների տեմպը՝ նշելով, որ փետրվարի կեսերին արդեն մեծ ծավալի աշխատանք է իրականացվել։

«Իհարկե, նաև խնդիրներն են մեծածավալ, նաև որոշակի հրատապ լուծումներ պահանջող։ Այնուամենայնիվ, մենք որոշակի խնդիրներ արձանագրել ենք վարչական շրջաններում։ Ինչ-որ տեղերում ունեցել ենք լավ արդյունքներ, ինչ-որ տեղ հարցեր, այնուամենայնիվ, առաջացել են»,- նշել է քաղաքապետը։

Ավինյանը նաև դատապարտել է առանց բիտումի փոսալցման փորձ կատարած որոշ շինարարական ընկերությունների վարքագիծը՝ հանձնարարելով ուժեղացնել վերահսկողությունը։