Թրամփը խոստացել է 200 % մաքսատուրքեր սահմանել ֆրանսիական գինու և շամպայնի նկատմամբ

Թրամփը կտրուկ արձագանքել է Փարիզի դիրքորոշմանը:

ԱՄՆ նախագահ Դոնալդ Թրամփը մեկնաբանել է տեղեկությունը, ըստ որի Ֆրանսիան չի ընդունելու «Խաղաղության խորհրդին» միանալու հրավերը։ Bloomberg-ի հաղորդմամբ՝ Ֆրանսիայի նախագահ Էմանուել Մակրոնը կարծում է, որ նախաձեռնության սկզբնական նպատակը եղել է Գազայի հատվածում խաղաղության հաստատումը, սակայն հետագայում խորհրդի կանոնադրությունն ընդլայնվել է, իսկ ՄԱԿ-ի դերակատարումը դարձել է ոչ միանշանակ։

Թրամփը կտրուկ արձագանքել է Փարիզի դիրքորոշմանը՝ հայտարարելով, որ ԱՄՆ-ն կարող է 200 տոկոսի մաքսատուրքեր սահմանել ֆրանսիական գինու և շամպայնի նկատմամբ։ Նա նաև կարծիք է հայտնել, որ Էմանուել Մակրոնը «այսպես թե այնպես շուտով կհեռանա նախագահի պաշտոնից»։

ԱՄՆ նախագահը հաստատել է, որ «Խաղաղության խորհրդին» միանալու հրավեր է ուղարկել նաև Ռուսաստանի նախագահին։ Համապատասխան առաջարկներ են ստացել Բելառուսի, Ղազախստանի, Թուրքիայի, ինչպես նաև մի քանի տասնյակ եվրոպական, արաբական և այլ երկրների առաջնորդներ։

Միևնույն ժամանակ նախաձեռնությունը բախվում է լուրջ դիմադրության Իսրայելի կողմից։ Վարչապետ Բենիամին Նեթանյահուն հայտարարել է, որ Գազայի հատվածում թուրքական կամ կատարական ներկայություն լինել չի կարող՝ ընդգծելով, որ Թուրքիայի մասնակցությունը անընդունելի է Թել Ավիվի համար։

Փորձագետների գնահատմամբ՝ «Խաղաղության խորհրդի» ձևավորման գործընթացը, որը ներկայացվում է որպես նոր բազմակողմ հարթակ, արագորեն վերածվում է աշխարհաքաղաքական հակասությունների նոր օջախի՝ միավորելով տնտեսական ճնշումները, դիվանագիտական դիմակայությունն ու տարածաշրջանային մրցակցությունը։