Թոփ 50 համալսարանների շրջանավարտները կարող են ազատվել պարտադիր զինծառայությունից՝ ՀՀ-ում աշխատանքի պայմանով

Նախագծի նպատակն է՝ խթանել բարձրակարգ կրթություն ստացած մասնագետների վերադարձը Հայաստան։

Պարտադիր զինվորական ծառայությունից կարող են ազատվել այն քաղաքացիները, որոնք ավարտել են Շանհայի վարկանիշավորման ցանկի առաջին հինգ տասնյակում ընդգրկված համալսարանները և ուսումն ավարտելուց հետո առնվազն երեք տարի կաշխատեն Հայաստանում՝ կառավարության կողմից սահմանված ոլորտներում։

Այս դրույթը ներառված է «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքի նախագծում, որը հունվարի 14-ին քննարկվել է ՀՀ Ազգային ժողովի Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նիստում։

Օրինագիծը հանձնաժողովին ներկայացրել է ԿԳՄՍ նախարար Ժաննա Անդրեասյանը։ Նրա ներկայացմամբ՝ կարգավորումը վերաբերում է այն քաղաքացիներին, ովքեր Շանհայի վարկանիշավորման թոփ 50 համալսարաններում սովորել են

• բակալավրիատում,

• մագիստրատուրայում կամ

• ասպիրանտուրայում

առկա ուսուցման ձևով և ավարտել են կրթական ծրագիրը։

Օրենքի նախագծով սահմանվում է, որ նշված պայմանները բավարարելու և ուսումն ավարտելուց հետո առնվազն երեք տարի ՀՀ-ում աշխատելու դեպքում՝ կառավարության կողմից նախապես սահմանված ոլորտում, քաղաքացին կազատվի պարտադիր զինվորական ծառայությունից։

Նախագծի նպատակն է՝ խթանել բարձրակարգ կրթություն ստացած մասնագետների վերադարձը Հայաստան և նրանց ներգրավումը երկրի ռազմավարական նշանակություն ունեցող ոլորտներում՝ համադրելով կրթական, աշխատաշուկայի և պաշտպանական քաղաքականությունները։