Քննարկվում է հարկեր վճարող և թափանցիկ աշխատող տաքսիստների վարկավորման հնարավորությունը

Վարորդների դժգոհության պատճառներից մեկը այն է, որ չգրանցված լինելու կամ եկամուտների պատշաճ արտացոլման բացակայության պատճառով բանկերը մերժում են վարկ տրամադրել։

ՀՀ էկոնոմիկայի նախարար Գևորգ Պապոյանը Կենտրոնական բանկի, Բանկերի միության և «Յանդեքս» ընկերության ներկայացուցիչների հետ նախաձեռնել է քննարկում՝ հարկեր վճարող և թափանցիկ աշխատող տաքսու վարորդների վարկավորման հնարավորությունների շուրջ։

Նախարարը հանդիպման մասին հայտնել է «Ֆեյսբուք»-ի իր էջում՝ ընդգծելով, որ գործընթացին կարող են միանալ նաև այլ տաքսի հարթակներ։

«Եթե կան տաքսու վարորդներ, ովքեր չունեն դասակարգված վարկեր, վճարում են հարկեր իրենց գործունեությունից և չեն կարողացել վարկավորվել իրենց թափանցիկ եկամուտներին համապատասխան, խնդրում եմ դիմել ձեզ սպասարկող ընկերությանը, օրինակ՝ Յանդեքսին, այնուհետև վերջիններս մեզ կփոխանցեն տվյալները՝ դեպք առ դեպք բանկերի հետ քննարկելու համար»,– նշել է Պապոյանը։

Վերջին օրերին «Յանդեքս» տաքսի ծառայության մի շարք վարորդներ բողոքի ակցիաներ են անցկացրել՝ բարձրաձայնելով իրենց չգրանցված լինելու խնդիրը։ Վարորդների դժգոհության պատճառներից մեկը այն է, որ չգրանցված լինելու կամ եկամուտների պատշաճ արտացոլման բացակայության պատճառով բանկերը մերժում են վարկ տրամադրել։

Քննարկումների նպատակն է գտնել լուծումներ, որոնք հնարավորություն կտան օրինական դաշտում գործող և հարկային պարտավորությունները կատարող վարորդներին օգտվել ֆինանսական ծառայություններից՝ իրենց հայտարարագրված եկամուտներին համապատասխան։