Rolex-ի և Cartier-ի ղեկավարները համոզել են Թրամփին նվազեցնել Շվեյցարիայի համար մաքսատուրքերը

Ապրիլի 2-ին Թրամփը հայտարարեց 185 երկրների և տարածքների արտադրանքի նկատմամբ մաքսատուրքեր սահմանելու մասին։

Վեց շվեյցարացի միլիարդատերեր, այդ թվում՝ Rolex և Cartier շքեղ ապրանքանիշերի սեփականատեր ընկերությունների ղեկավարները, նոյեմբերի 4-ին Վաշինգտոնում հանդիպել են ԱՄՆ նախագահ Դոնալդ Թրամփի հետ՝ շվեյցարական ապրանքների մաքսատուրքերի 39%-ով նվազեցման հույսով, հաղորդում է Tribune de Genève թերթը։

Հաղորդագրության համաձայն, Օվալաձև աշխատասենյակում Թրամփի հետ հանդիպմանը մասնակցել են շքեղության և էներգետիկայի ոլորտների ներկայացուցիչներ, որոնցից հինգը «Ժնևում գտնվող միջազգային կորպորացիաների ղեկավարներ» են եղել։ Նրանց թվում են եղել Rolex-ի գործադիր տնօրեն Ժան-Ֆրեդերիկ Դյուֆուրը և նրա մրցակից Յոհան Ռուպերտը, Cartier, Piaget և Vacheron Constantin ընկերությունների սեփականատեր Richemont-ի նախագահը։ Շվեյցարիայի կառավարությունը ներկա չի եղել բանակցություններին։

«Մինչ այժմ ոչ ոք չի բացահայտել հանդիպման տևողությունն ու դրա բովանդակությունը»,- ուշադրություն է հրավիրել պարբերականը։ «Նաև վստահություն չկա, որ Շվեյցարիան մոտեցել է իր նպատակին՝ շվեյցարական ապրանքների ներմուծման համար ԱՄՆ-ի մաքսատուրքերի 39%-ով նվազեցմանը»։

Թերթի տվյալներով, բանակցություններին մասնակցել են նաև աշխարհի խոշորագույն կոնտեյներային օպերատոր MSC-ի նախագահ Դիեգո Ապոնտեն, խոշոր համաշխարհային նավթային թրեյդեր Mercuria-ի համահիմնադիր Դանիել Եգգին, թանկարժեք մետաղների առևտրի և վերամշակման MKS PAMP խմբի ղեկավար Մարվան Շաքարչին և Partners Group ներդրումային ընկերության համահիմնադիր Ալֆրեդ Գանտները։ Համատեղ հայտարարության մեջ ձեռնարկատերերը նշել են, որ իրենց նախաձեռնությամբ կազմակերպված հանդիպումը կոչված է եղել «Շվեյցարիայի և ԱՄՆ-ի տնտեսական հարաբերությունների ամրությունն ու կայունությունը ընդգծելուն»։ Այնտեղ ասվում է նաև, որ միլիարդատերերը «չեն մասնակցել ամերիկացի նախագահի հետ ուղիղ բանակցություններին»։

Օգոստոսի սկզբին «Tribune de Genève»-ը հայտնել էր, որ Թրամփը անտեսել է Շվեյցարիայի նախագահ Կարին Քելլեր-Զուտտերի այցը, որը մեկնել էր Վաշինգտոն՝ հույս ունենալով Սպիտակ տան հետ համաձայնության հասնել այն բանից հետո, երբ նա հայտարարել է օգոստոսի 7-ին կոնֆեդերացիայի նկատմամբ 39% չափով ներմուծման մաքսատուրքեր մտցնելու պլանների մասին։

Ապրիլի 2-ին Թրամփը հայտարարեց 185 երկրների և տարածքների արտադրանքի նկատմամբ մաքսատուրքեր սահմանելու մասին։ Օգոստոսի 1-ին նա հրամանագիր է ստորագրել ավելի քան 60 երկրների և Եվրամիության նկատմամբ 15%-ից մինչև 41% չափով մաքսատուրքերի մասին։ Դրանք ուժի մեջ են մտել օգոստոսի 7-ին։ Ամենաբարձր մաքսատուրքերը սահմանվել են Իրաքի (35%), Սերբիայի (35%), Շվեյցարիայի (39%), Լաոսի (40%), Մյանմայի (40%) և Սիրիայի (41%) համար։