Նոյեմբերի 25-ի կարևոր լուրերը

Արաբկիրում բացահայտվել է հանցավոր «զանգերի կենտրոն»
Ոստիկանությունն ու Քննչական կոմիտեն բացահայտել են խումբ, որը կեղծ հարթակներով և կրիպտո դրամապանակներով հափշտակել է օտարերկրյա քաղաքացիների գումարները։ Գործն ընթանում է, համագործակցություն է իրականացվում արտասահմանյան կառույցների հետ։

Վերին Լարս ուղևորվող կոնյակաբեռն մեքենաների անցումը շարունակվում է
Էկոնոմիկայի նախարար Գևորգ Պապոյանը հայտնել է, որ 83 բեռնատար կարող են անցնել Գեզիից դեպի Վերին Լարս։ Նախօրեին բաց էր թողնվել 56 մեքենա։

Արշակ Խաչատրյանի գործով Սրբազանը տուժող չի ճանաչվել
Մայր Աթոռի դիվանապետ Արշակ արքեպիսկոպոս Խաչատրյանի փաստաբանը նշել է, որ նախաքննությունը սխալ հոդվածով է ընթանում։ Սրբազանը պնդում է, որ տեսանյութը իրեն չի վերաբերում, իսկ իրական վնասը հասցվել է ատելության տարածմամբ։

Արտասահմանցի վարորդների տուգանքների ծանուցումները կփոխվեն
Պետբյուջեից տարեկան ավելի քան 90 մլն դրամ ծախսվել է արտասահմանցի վարորդների տուգանքների ծանուցումների համար։ ՆԳՆ-ն առաջարկում է, որ նրանք ծանուցումները ստանան և տուգանքները վճարեն սահմանը հատելիս։ Օդանավակայանից մուտք գործողների վերաբերյալ սակայն հարցը դեռ լուծված չէ։

Կիբերհանցագործությունների զոհերը բողոքի ակցիա են անցկացրել ՔԿ դիմաց
Տուժողները պահանջել են վերադարձնել իրենց շորթված գումարները՝ քննիչներին մեղադրելով անբավարար աշխատանքի և զոհերին մեղադրելու մեջ։ Իրավապաշտպանները դա անվանել են անթույլատրելի մոտեցում։

Կառավարությունը քննարկում է ՀԷՑ-ի հետագա ռազմավարական մոդելները
Վարչապետ Նիկոլ Փաշինյանի խոսքով՝ դիտարկվում են երկու տարբերակ՝

1. ՀԷՑ-ի պետականացում և կառավարում կոնցեսիոն սկզբունքով։

2. Թափանցիկ մրցույթ՝ նոր ներդրողի ընտրությամբ, եթե պետական ֆինանսավորումը նպատակահարմար չլինի։