Մասկը՝ ընդդեմ ChatGPT-ի․ ինքնասպանությունների մեղադրանքներ և բաց պատերազմ տեխնոհսկաների միջև

Մասկը տարածել է պնդում, թե ChatGPT-ը կապված է 9 մահվան դեպքի հետ։

Ամերիկացի միլիարդատեր Իլոն Մասկը վերահրապարակել է պնդում, ըստ որի՝ ChatGPT-ն կապ ունի ինքնասպանության մի շարք դեպքերի հետ՝ միաժամանակ կոչ անելով օգտատերերին հրաժարվել առաջատար չաթ-բոտից։ Այս մասին հայտնում է Forbes-ը։

Մասկը տարածել է պնդում, թե «ChatGPT-ը կապված է 9 մահվան դեպքի հետ, որոնցից 5-ի դեպքում դրա հետ փոխազդեցությունները, ըստ հաղորդումների, հանգեցրել են ինքնասպանության՝ ներառյալ դեռահասների և մեծահասակների շրջանում»։

Հրապարակմանը կից նա հանդես է եկել հանրային կոչով․
«Թույլ մի՛ տվեք ձեր մերձավորներին օգտագործել ChatGPT»։

Մասկի այս հայտարարությունից մի քանի ժամ անց OpenAI-ի գլխավոր տնօրեն Սեմ Ալթմանը հանդես է եկել պաշտպանական և հակադարձ հայտարարությամբ։ Նա կտրուկ քննադատել է Grok-ը՝ նշելով, որ այն քննադատության է ենթարկվում առանց համաձայնության սեքսուալ բնույթի պատկերներ ստեղծելու համար։ Ալթմանը անդրադարձել է նաև Tesla ընկերությանը՝ շեշտադրելով ինքնակառավարման համակարգի շուրջ առկա խնդիրներն ու ռիսկերը։

Միջադեպը նոր թափ է հաղորդել արհեստական բանականության ոլորտում անվտանգության, էթիկայի և պատասխանատվության վերաբերյալ շարունակվող բանավեճերին, հատկապես՝ առաջատար տեխնոլոգիական ընկերությունների ղեկավարների միջև հրապարակային հակասությունների ֆոնին։