Աշխարհի խոշորագույն Կենտրոնական բանկերի ցանկը՝ ըստ համախառն ակտիվների

Ռուսաստանը վարկանիշային աղյուսակում ներառված չէ։

Եվրագոտին հանդիսանում է կենտրոնական բանկերի աշխարհի խոշորագույն դաշինքը՝ համախառն ակտիվների ծավալով։ Եվրագոտու կենտրոնական բանկերի համակարգի ակտիվները կազմել են շուրջ 7.13 տրիլիոն դոլար։ Այդ մասին հայտնում է Naked Science-ը՝ Միջազգային հաշվարկների բանկի (BIS) տվյալների հիման վրա կազմված վարկանիշային աղյուսակին հղումով։

Վարկանիշում երկրորդ տեղում է Չինաստանը՝ 6.62 տրիլիոն դոլար համախառն ակտիվներով, իսկ երրորդ տեղում՝ ԱՄՆ-ն՝ 6.58 տրիլիոն դոլար ցուցանիշով։ Այս տվյալները ցույց են տալիս, որ գլոբալ դրամավարկային համակարգում ուժերի դասավորությունը շարունակում է ձևավորվել մի քանի խոշոր կենտրոնների շուրջ։

Ավանդաբար բարձր դիրք է զբաղեցնում նաև Ճապոնիան։ Ճապոնիայի կենտրոնական բանկի ակտիվները կազմել են 4.51 տրիլիոն դոլար։ Երկրի կենտրոնական բանկի հաշվեկշիռը տարիներ շարունակ աճում է՝ մեղմ դրամավարկային քաղաքականության և լայնածավալ խթանիչ ծրագրերի արդյունքում։

Լավագույն հնգյակում է հայտնվել նաև Շվեյցարիան։ Շվեյցարիայի ազգային բանկի ակտիվների զգալի մասը կազմում են արտաքին պահուստները՝ արտարժույթը և արժեթղթերը, որոնք ակտիվորեն կիրառվում են նաև ազգային արժույթի փոխարժեքի կայունացման նպատակով։

Առաջատար տասնյակում են ընդգրկվել նաև Մեծ Բրիտանիայի, Հնդկաստանի, Բրազիլիայի, Սինգապուրի և Հոնկոնգի կենտրոնական բանկերը։ Հատկանշական է, որ Հնդկաստանի և Բրազիլիայի ընդգրկումը լավագույն տասնյակում վկայում է զարգացող շուկաների աճող դերի մասին գլոբալ դրամավարկային համակարգում։

Նշվում է, որ Ռուսաստանը վարկանիշային աղյուսակում ներառված չէ, քանի որ համադրելի և արդիական տվյալները մշտապես հասանելի չեն։