Հունվարի 13-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

Ֆինանսների նախարարությունը պարզաբանել է ԱՐՔԱ քարտերով 2% հետվճարի շրջանակում տվյալների պաշտպանության հարցը
ՀՀ ֆինանսների նախարարությունը հայտնել է, որ ԱՐՔԱ համակարգով 2% հետվճարի ծրագրի շրջանակում քաղաքացիների գործարքների անձնական կամ բանկային տվյալները պետությանը չեն փոխանցվում։ Նախարարությունը կոչ է արել վստահել միայն պաշտոնական աղբյուրներին և չտարածել ապատեղեկատվություն։

2025-ի երկրորդ կիսամյակում ՀԷՑ-ի կողմից վճարվել է 8.6 մլրդ դրամի հարկեր և տուրքեր
ՀԷՑ ժամանակավոր կառավարիչ Ռոմանոս Պետրոսյանի տվյալներով՝ 2025 թվականի երկրորդ կիսամյակում ընկերությունը վճարել է 8.6 մլրդ դրամ հարկեր և տուրքեր՝ նախորդ տարվա համեմատ աճելով շուրջ 64%-ով։ Աշխատավարձային վճարումները կազմել են 9.5 մլրդ դրամ՝ 8.5% աճով։

2025թ. հունվար-նոյեմբերին ՀՀ պետբյուջեի եկամուտները կազմել են 2 տրիլիոն 579 մլրդ դրամ
Վիճակագրական կոմիտեի տվյալներով՝ 2025 թվականի հունվար-նոյեմբերին պետբյուջեի եկամուտներն աճել են 13.7%-ով՝ կազմելով 2,579 մլրդ դրամ։ Միևնույն ժամանակ ծախսերը կազմել են 2,844 մլրդ դրամ՝ աճելով նույն չափով։

2025 թվականին Հայաստանում բենզինի գինը նվազել է 2.2%-ով, դիզվառելիքինը՝ 4.1%-ով
2025 թվականի դեկտեմբերին բենզինի և դիզելային վառելիքի գները տարեկան կտրվածքով նվազել են համապատասխանաբար 0.8% և 0.9%-ով։ Ամսական կտրվածքով գրանցվել է բենզինի 0.1% աճ և դիզելային վառելիքի 0.1% նվազում։

2025թ. դեկտեմբերին Հայաստանում 12-ամսյա գնաճը կազմել է 3.3%
Տարեկան ամենաբարձր գնաճը գրանցվել է սննդամթերքի շուկայում՝ 4.3%։ Միաժամանակ բանջարեղենի գները տարեկան նվազել են 7.5%-ով, սակայն ամսական կտրվածքով աճել՝ 12.5%-ով։

ՄԻՋԱԶԳԱՅԻՆ ԼՈՒՐԵՐ

Թրամփը 25% մաքսատուրք է սահմանել Իրանի հետ բիզնես վարող երկրների նկատմամբ
Դոնալդ Թրամփի հայտարարությամբ՝ Իրանի հետ տնտեսական կապեր ունեցող երկրները ԱՄՆ-ի հետ գործարքների դեպքում կենթարկվեն 25% մաքսատուրքի։ Քայլը, ըստ CNN-ի, կարող է առավելապես ազդել Չինաստանի վրա։

ԵՄ-ն մինչև փետրվարի 24-ը կարող է ներկայացնել ՌԴ-ի դեմ պատժամիջոցների 20-րդ փաթեթը
Եվրամիությունը քննարկում է Ռուսաստանի դեմ պատժամիջոցների հերթական փաթեթը, որը կարող է ներառել արտահանման նոր սահմանափակումներ, նավթային լցանավերի սպասարկման խստացում և պարարտանյութերի ներմուծման կրճատում։

Գերմանիայի գազի պաշարները նվազել են մինչև ռեկորդային նվազագույն մակարդակ
Գերմանիայի ստորգետնյա գազապահեստարանները լցված են ընդամենը 48.3%-ով, ինչը հունվարի սկզբի համար վերջին տարիների ամենացածր ցուցանիշն է և մտահոգություններ է առաջացնում էներգետիկ անվտանգության շուրջ։

2025թ. կիսահաղորդիչների համաշխարհային շուկայի եկամուտը աճել է 21%-ով
2025 թվականին կիսահաղորդիչների շուկայի համաշխարհային եկամուտը հասել է 793.4 մլրդ դոլարի։ Nvidia-ն դարձել է առաջին չիպարտադրողը, որի տարեկան եկամուտը գերազանցել է 100 մլրդ դոլարը, իսկ շուկայի հիմնական աճը պայմանավորված է արհեստական բանականության չիպերով։