Ղարաբաղից բռնի տեղահանված 4066 ընտանիք ստացել է բնակարանային աջակցության հավաստագիր

Ծրագիրը նախատեսում է բնակարանային աջակցության տրամադրում մի քանի ձևաչափով։

Ղարաբաղից բռնի տեղահանված ընտանիքների բնակարանային ապահովման պետական աջակցության ծրագրի շրջանակում 2026 թվականի հունվարի 8-ի դրությամբ հավաստագիր է ստացել 4066 ընտանիք։ Այդ ընտանիքներից 1768-ն արդեն իրացրել է տրամադրված հավաստագիրը։ Տվյալները ներկայացրել է ՀՀ աշխատանքի և սոցիալական հարցերի նախարարությունը։

Ծրագիրը նախատեսում է բնակարանային աջակցության տրամադրում մի քանի ձևաչափով։ Մասնավորապես՝ շահառուները կարող են ընտրել բնակարանի ձեռքբերման կամ կառուցվող շենքից բնակարան գնելու իրավունքի հավաստագիր, անհատական բնակելի տան ձեռքբերման կամ կառուցման հավաստագիր, ինչպես նաև գործող հիփոթեքային վարկի մարման աջակցություն։

Ծրագրի շրջանակում աջակցությունը տրամադրվում է ընտանիքի յուրաքանչյուր անդամի հաշվով՝ 3-ից 5 միլիոն դրամի չափով՝ կախված սահմանված չափորոշիչներից։

Շահառու կարող են հանդիսանալ այն ընտանիքները, որոնք տեղահանվել են 2020 թվականի սեպտեմբերի 27-ից հետո, ունեն Հայաստանի Հանրապետության քաղաքացիություն, չունեն սեփական բնակարան և չեն հանդիսանում այլ բնակարանային պետական աջակցության ծրագրերի շահառու։

Ծրագրի նպատակն է ապահովել բնակարանային կայուն լուծումներ բռնի տեղահանված ընտանիքների համար։