ԵՀ-ն արտահերթ նիստ է գումարել «Դրուժբա» նավթատարի շուրջ վեճի պատճառով

Բուդապեշտն ու Բրատիսլավան, որոնք զգալիորեն կախված են խողովակաշարով տեղափոխվող ռուսական նավթից, մեղադրել են Կիևին վերանորոգման աշխատանքները քաղաքական պատճառներով դիտավորյալ հետաձգելու մեջ։

Եվրոպական հանձնաժողովը (ԵՀ) արտահերթ նիստ է գումարել նավթային համակարգող խմբի շրջանակում՝ «Դրուժբա» նավթատարի շուրջ Հունգարիայի, Սլովակիայի և Ուկրաինայի միջև սրված վեճը քննարկելու համար։ Այս մասին հայտնում է Euronews-ը։

Նախօրեին Հունգարիան և Սլովակիան դադարեցրել էին դիզելային վառելիքի մատակարարումն Ուկրաինային այն բանից հետո, երբ Ռուսաստանի հարձակումը խափանել էր Ուկրաինայի տարածքով անցնող խողովակաշարի աշխատանքը։

Բուդապեշտն ու Բրատիսլավան, որոնք զգալիորեն կախված են խողովակաշարով տեղափոխվող ռուսական նավթից, մեղադրել են Կիևին վերանորոգման աշխատանքները քաղաքական պատճառներով դիտավորյալ հետաձգելու մեջ։

Եվրահանձնաժողովը հայտարարել է, որ հաջորդ չորեքշաբթի կկայանա հատուկ նիստ, որին կմասնակցեն Հունգարիայի, Սլովակիայի և Խորվաթիայի ներկայացուցիչները։

«Մենք գումարել ենք նավթային համակարգող խմբի հատուկ նիստ՝ մատակարարման խափանումների հետևանքները և վառելիքի մատակարարման հնարավոր այլընտրանքային տարբերակները քննարկելու համար», — նշել է ԵՀ խոսնակ Աննա-Կայսա Իտկոնենը։

Հունգարիան Բրյուսելին խնդրել է հեշտացնել ծովային ճանապարհով ռուսական նավթի տեղափոխումը Խորվաթիայի Ադրիատիկ խողովակաշարով՝ որպես այլընտրանքային երթուղի, սակայն պաշտոնական Զագրեբը մերժել է այդ առաջարկը։