Արմավիրի համայնքային ոստիկանները առգրավել են ապօրինի զենք-զինամթերք

Ջանֆիդա գյուղի 46-ամյա բնակիչը ձերբակալվել և տեղափոխվել է ձերբակալվածների պահման վայր։

Համայնքային ոստիկանության Արմավիրի բաժնում հունվարի 21-ին ստացվել են օպերատիվ տեղեկություններ, ըստ որոնց՝ Արմավիրի մարզի Ջանֆիդա գյուղի 46-ամյա բնակիչը իր բնակության հասցեում ապօրինի պահում է զենք-զինամթերք, ինչպես նաև պահում և օգտագործում է թմրամիջոց։

Տեղեկությունների հիման վրա նախաձեռնվել է քրեական վարույթ։ Դատարանի որոշմամբ իրականացված խուզարկության ընթացքում տղամարդու տան նկուղում հայտնաբերվել են նռնակ՝ իր պայթուցիչով, գնդացիրի և ինքնաձիգի 113 փամփուշտ, սվին-դանակ, ազդանշանային հրթիռանետիչ, գիշերային դիտարկման հեռադիտակ, մեկփողանի ողորկափող հրացան և նետողական զենք։

Բացի այդ, նրա տիրապետության տակ գտնվող մեկ այլ տան նկուղում հայտնաբերվել են մեկփողանի ողորկափող որսորդական հրացան և ինքնաձիգի փամփուշտ։

Ջանֆիդա գյուղի 46-ամյա բնակիչը ձերբակալվել և տեղափոխվել է ձերբակալվածների պահման վայր։ Կատարվում է նախաքննություն։

Իրավապահ մարմինները հայտնում են, որ այն դեպքերում, երբ ապօրինի պահվող զենք-զինամթերքը հայտնաբերվում և առգրավվում է իրավապահների կողմից, քրեական պատասխանատվությունը ենթակա է կիրառման։ Միևնույն ժամանակ, կամավոր հանձնման դեպքում օրենքով նախատեսվում է քրեական պատասխանատվությունից ազատում։