AMX. 2025թ.-ի նոյեմբեր ամսվա բորսայական տվյալներն ամփոփ

Ամսվա ընթացքում պահպանվել է դինամիկ առևտրային միջավայրը՝ ընդգծելով ներդրողների աճող վստահությունը և շուկայական ակտիվությունը։

Հայաստանի ֆոնդային բորսան (AMX) ամփոփել է 2025 թվականի նոյեմբեր ամսվա շուկայական տվյալները։ Ամսվա ընթացքում պահպանվել է դինամիկ առևտրային միջավայրը՝ ընդգծելով ներդրողների աճող վստահությունը և շուկայական ակտիվությունը։

Նոյեմբերին Հայաստանի ֆոնդային բորսայի պետական պարտատոմսերի առաջնային տեղաբաշխման հարթակում տեղաբաշխվել է շուրջ 43․4 մլրդ ՀՀ դրամի պարտատոմս, իսկ երկրորդային շուկայում իրականացվել է 86 գործարք՝ ավելի քան 28․2 մլրդ ՀՀ դրամ ծավալով, որը 109%-ով գերազանցում է նախորդ տարվա համապատասխան ցուցանիշը։

Կորպորատիվ պարտատոմսերի շուկայում գրանցվել է առևտրի ծավալի 26% աճ նախորդ տարվա նույն ժամանակահատվածի նկատմամբ՝ կազմելով ավելի քան 11.7 մլրդ ՀՀ դրամ։ Հաշվետու ժամանակահատվածում կնքվել է 1159 գործարք՝ նոյեմբերի վերջի դրությամբ բորսայում շրջանառվող 165 կորպորատիվ պարտատոմսերով։ Այս կայուն աճը արտացոլում է կորպորատիվ պարտատոմսերի նկատմամբ առողջ պահանջարկը։

Բաժնետոմսերի շուկայում առևտրի ծավալը կազմել է մոտ 60 մլն ՀՀ դրամ, իսկ շուկայի կապիտալիզացիան՝ ավելի քան 463.4 մլրդ ՀՀ դրամ։ Նախորդ տարվա նույն ժամանակահատվածի ցուցանիշի համեմատ շուկայի կապիտալիզացիան աճել է՝ 10.6%-ով*։ Բաժնետոմսերով կնքվել է 144 գործարք։

Ռեպո գործարքների ընդհանուր ծավալը կազմել է շուրջ 4․2 մլրդ ՀՀ դրամ: Նոյեմբերին կնքվել է 37 ռեպո գործարք։

2025 թ․ ապրիլ ամսից Հայաստանի ֆոնդային բորսայի կայքէջում հասանելի են դարձել նաև Զամբյուղային ռեպո հարթակում իրականացված գործարքների տվյալները։ Այս հարթակում նոյեմբեր ամսվա ընթաքում կնքվել է 9 գործարք՝ ավելի քան 15,6 մլրդ ՀՀ դրամ ընդհանուր ծավալով։

Նոյեմբերին ՀՖԲ արտարժույթի շուկայում իրականացվել է ԱՄՆ դոլարի փոխանակում ավելի քան 3․3 մլրդ ՀՀ դրամ ծավալով՝ 8 գործարքով։ Ամսվա ընթացքում դոլարի նկատմամբ պահանջարկի փոխարժեքը ձևավորվել է 381.50– 381․75 դրամ միջակայքում, առաջարկը՝ 381․50-383 դրամի միջակայքում։ Կնքված գործարքների միջին գինը կազմել է 382.03 դրամ։

Ամսական տվյալների համեմատական գրաֆիկները կարող եք տեսնել AMX-ի պաշտոնական կայքում:

*Հաշվարկի մեթոդաբանության վերանայման արդյունքում կապիտալիզացիայի հաշվարկում կատարվել են փոփոխություններ, որոնց արդյունքում ունենք տարբերություններ․ այսուհետ բաժնետոմսերի կապիտալիզացիան կներառի նաև արտոնյալ բաժնետոմսերի ծավալը։

AMX-ը Հայաստանում գործող միակ ֆոնդային բորսան է, որը հանդիսանում է նաև Հայաստանի կենտրոնական դեպոզիտարիայի միակ բաժնետերը: AMX խմբի առաքելությունն է նպաստել Հայաստանում բարենպաստ ներդրումային միջավայրի ձևավորմանը՝ առաջարկելով արդյունավետ լուծումներ ու ծառայություններ, այդ թվում՝ արժեթղթերի առևտրի, քլիրինգի, վերջնահաշվարկի և կենսաթոշակային համակարգի ակտիվների պահառության և ռեեստրավարման ոլորտում: