Վերջին օրերին նկատվում է Իրանից բեռնափոխադրման ծավալների որոշակի նվազում․ ՊԵԿ

Կուտակումներ չառաջացնելու նպատակով քաղաքացիների համար կարող են կիրառվել որոշակի սահմանափակումներ՝ բեռնատարների բնականոն տեղաշարժն ապահովելու համար։

Իրանի հետ սահմանի Ագարակ անցակետից դուրս՝ հայկական կողմում, այս պահին 180-200 բեռնատար սպասում է սահմանը հատելու հնարավորությանը։ Այս մասին NEWS.am–ի հետ զրույցում հայտնել են Պետական եկամուտների կոմիտեից։

ՊԵԿ–ից նշել են, որ իրանական կողմում պարբերաբար կապի խափանումներ են գրանցվում, ինչի հետևանքով կարող են առաջանալ հերթեր։ Կապի բացակայության դեպքում ձևակերպումները իրականացվում են նաև թղթային տարբերակով, ինչը ժամանակատար գործընթաց է։

Կուտակումներ չառաջացնելու նպատակով քաղաքացիների համար կարող են կիրառվել որոշակի սահմանափակումներ՝ բեռնատարների բնականոն տեղաշարժն ապահովելու համար։

ՊԵԿ–ից նաև հայտնել են, որ Իրանում ստեղծված իրավիճակի պատճառով որոշ բեռնափոխադրողներ խուսափում են Իրանի տարածքը որպես տարանցիկ ուղի օգտագործելուց՝ նախընտրելով Չինաստանից և Մերձավոր Արևելքի այլ երկրներից ներկրվող բեռների փոխադրումն իրականացնել Վրաստանի տարածքով։

Այս ֆոնին վերջին օրերին արձանագրվել է Իրանի տարածքով բեռնափոխադրումների որոշակի նվազում, թեև այն, ըստ գերատեսչության, «շատ արտահայտիչ չէ»։