2025 թվականին Հայաստան է այցելել 2.26 մլն զբոսաշրջիկ

Հայաստանի զբոսաշրջային պատմության մեջ ամենաբարձր ցուցանիշները գրանցվել են 2023 թվականին։

2025 թվականին Հայաստան է այցելել 2 263 642 զբոսաշրջիկ։ Տվյալը ներկայացրել է ՀՀ էկոնոմիկայի նախարար Գևորգ Պապոյանը կառավարության նիստի ընթացքում։

Նախարարի խոսքով՝ ցուցանիշը 2.5 տոկոսով գերազանցում է 2024 թվականի մակարդակը և 19.4 տոկոսով՝ 2019 թվականի նախահամաճարակային ցուցանիշը։ Միաժամանակ նշվել է, որ 2025 թվականին Ռուսաստանից Հայաստան ժամանած զբոսաշրջիկների թիվը 216 հազարով պակաս է եղել՝ համեմատած 2023 թվականի հետ։

Այդ նվազումը մասամբ փոխհատուցվել է այլ երկրներից ժամանած զբոսաշրջիկների աճով։ Ըստ ներկայացված տվյալների՝ ոչ ռուսական շուկաներից Հայաստան է այցելել 166 հազարով ավելի զբոսաշրջիկ, ինչի արդյունքում ընդհանուր տարբերությունը կազմել է մոտ 50 հազար այց։

Նախարարի փոխանցմամբ՝ կառավարության զբոսաշրջային քաղաքականությունը միտված է շուկաների դիվերսիֆիկացմանը։ Եթե նախկինում Ռուսաստանի մասնաբաժինը ընդհանուր զբոսաշրջային հոսքում կազմում էր 52–53 տոկոս, ապա ներկայում այն նվազել է մինչև 41 տոկոս։ Նպատակ է դրված պահպանել այդ ծավալը՝ միաժամանակ ավելացնելով զբոսաշրջիկների հոսքը այլ երկրներից։

Նշվել է նաև, որ Հայաստանի զբոսաշրջային պատմության մեջ ամենաբարձր ցուցանիշները գրանցվել են 2023 թվականին։