Ռուսաստանում քաղցկեղով հիվանդ առաջին պացիենտները կարող են փորձարարական պատվաստանյութ ստանալ

Մեթոդը կարող է ազդեցություն ունենալ ոչ միայն հիմնական ուռուցքի, այլև մետաստազների վրա։

Ռուսաստանում քաղցկեղով հիվանդ առաջին պացիենտները կարող են նոր փորձարարական պատվաստանյութ ստանալ արդեն 2026 թվականի ապրիլի սկզբից։ Այս մասին հայտարարել է միկրոբիոլոգ, Գամալեայի անվան համաճարակաբանության և մանրէաբանության ազգային կենտրոնի նախկին տնօրեն Ալեքսանդր Գինցբուրգը՝ «Ռադիո Սպուտնիկ»-ի եթերում։

Գինցբուրգի խոսքով՝ խոսքը անհատականացված պատվաստանյութի մասին է, որը ստեղծվում է յուրաքանչյուր հիվանդի համար առանձին։

Հատուկ ծրագրային ապահովման միջոցով, որը մշակվել է Գամալեայի կենտրոնի և Հերցենի անվան Մոսկվայի ուռուցքաբանական ինստիտուտի մասնագետների կողմից, որոշվում են տվյալ հիվանդի ուռուցքին բնորոշ սպիտակուցները։ Դրանք օրգանիզմ ներմուծելուց հետո ակտիվացնում են իմունային համակարգը, որն սկսում է թիրախային պայքար ուռուցքային բջիջների դեմ։

Մասնագետների գնահատմամբ՝ մեթոդը կարող է ազդեցություն ունենալ ոչ միայն հիմնական ուռուցքի, այլև մետաստազների վրա։

Միաժամանակ Ռուսաստանի առողջապահության նախարարությունը նախատեսում է 2026 թվականից ընդլայնել պարտադիր բժշկական ապահովագրության (ОМС) ծրագիրը և դրա շրջանակում ներառել նաև քաղցկեղի դեմ նման պատվաստանյութերով բուժումը։