2025-ին Հայաստանում էլեկտրաէներգիայի արտադրությունն աճել է 5.8 %-ով

2025 թվականին շարունակվել է էլեկտրաէներգիայի արտահանումը դեպի Իրան և Վրաստան։

2025 թվականին Հայաստանում արտադրվել է 9 մլրդ 721 մլն կիլովատտ-ժամ էլեկտրաէներգիա, ինչը 5.8 տոկոսով ավելի է, քան 2024 թվականին։ Տվյալները ներկայացրել է տարածքային կառավարման և ենթակառուցվածքների նախարար Դավիթ Խուդաթյանը նախարարության 2025 թվականի գործունեության ամփոփիչ ասուլիսի ընթացքում։

Նախարարի խոսքով՝ էլեկտրաէներգիայի արտադրության աճին զուգահեռ էականորեն ավելացել է արևային էներգետիկայի դերը էներգահամակարգում։ Ներկայումս համակարգին միացված են շուրջ 1100 մեգավատտ դրվածքային հզորությամբ արևային էներգակայաններ, ինչը նախորդ տարվա համեմատ աճել է 43 տոկոսով։

Արևային կայանների զգալի մասը փոքր հզորության տնային տնտեսությունների կայաններ են։ Դրանց թիվը գերազանցում է 50 հազարը, իսկ համակցված արտադրական հզորությունը կազմում է շուրջ 650 մեգավատտ։ Ըստ ներկայացված տվյալների՝ արևային կայանների քանակական աճը կազմել է 60 տոկոս, իսկ հզորությունների աճը՝ 52 տոկոս։

Նախարար Խուդաթյանը տեղեկացրել է նաև, որ 2025 թվականին շարունակվել է էլեկտրաէներգիայի արտահանումը դեպի Իրան և Վրաստան, ինչը պահպանել է Հայաստանի դերը տարածաշրջանային էներգետիկ փոխանակումներում։

Էլեկտրաէներգիայի շուկայի ազատականացման մասով նշվել է, որ արտադրված էլեկտրաէներգիայի 33 տոկոսը վաճառվելու է ազատականացված շուկայում։ Ըստ նախարարության՝ այս ցուցանիշը կարևոր է շուկայի մրցակցային միջավայրի ձևավորման և ոլորտի կայուն զարգացման տեսանկյունից։