Նոր ճանապարհ Վրաստանից դեպի Հայաստան՝ պետական նախագծում Վրաստանի կառավարությունը սկսել է հողերի օտարումը սեփականատերերից դեպի Հայաստանի սահման՝ Ռուսթավի-Սադախլո նոր ավտոմայրուղու կառուցման նպատակով, հայտնում է Newsgeorgia-ն։ Վրաստանի Էկոնոմիկայի նախարարության կողմից հրապարակված հրամանի համաձայն՝ ծրագիրը ֆինանսավորվում է Եվրոպական ներդրումային բանկի կողմից՝ Արևելք-Արևմուտք միջազգային ճանապարհային ծրագրի վարկային համաձայնագրի շրջանակներում։ Նոր ավտոմայրուղու շինարարությունը կարժենա 250 մլն եվրո։ Մայրուղին կառուցվելու է գործող ճանապարհի զուգահեռ, ունենալու է չորս գոտի, իսկ ընդհանուր երկարությունը կազմելու է մոտ 30 կիլոմետր, ներառյալ 11 կամուրջները և անցումները։ Նախարարի հրամանում նշվում է, որ մի քանի հողատերեր հրաժարվել են վաճառել իրենց հողատարածքները կամ չեն համաձայնվել առաջարկվող գնին, ինչի հետևանքով հողերի օտարումը տեղի է ունենալու հարկադիր կարգով։ Ըստ Վրաստանի Սահմանադրության 19-րդ հոդվածի՝ գույքի հարկադիր օտարումը թույլատրվում է հանրային հրատապ շահի դեպքում՝ լրիվ և արդարացի փոխհատուցման պայմանով։ Նախարարի հրամանը կարող է բողոքարկվել Թբիլիսիի քաղաքային դատարանի վարչական խորհուրդում մեկ ամսվա ընթացքում։