Մարդատար-տաքսի ավտոմոբիլներով ուղևորափոխադրումների ոլորտում կատարված փոփոխությունների մասին Համաձայն «Ավտոմոբիլային տրանսպորտի մասին» ՀՀ օրենքում կատարված փոփոխությունների` 2024 թվականի սեպտեմբերի 1-ից սկսած` ոչ կանոնավոր ուղևորափոխադրումներ իրականացնող տնտեսվարողների համար սահմանվում են խաղի նոր կանոններ: Կազմակերպությունները, անհատ ձեռնարկատերերը և ֆիզիկական անձինք այսուհետ տաքսու գործունեություն կարող են իրականացնել երկու եղանակով՝ հարկային մարմնի էլեկտրոնային համակարգին միանալով կամ էլեկտրոնային հարթակով ուղեևորափոխադրման ծառայության միջոցով: Ֆիզիկական անձանց կողմից թեթև մարդատար ավտոմոբիլներով ոչ կանոնավոր ուղևորափոխադրումների իրականացումը թույլատրվելու է միայն էլեկտրոնային հարթակով ուղևորափոխադրման ծառայության միջոցով: Իսկ մարդատար-տաքսի ավտոմոբիլներով ուղևորափոխադրումներ իրականացնելու համար կազմակերպությունները, անհատ ձեռնարկատերերը կամ ֆիզիկական անձինք պետք է միանան հարկային մարմնի էլեկտրոնային համակարգին և յուրաքանչյուր պատվերի իրականացման դեպքում պատվիրատուին տրամադրեն պատվերի վճարման էլեկտրոնային հսկիչ դրամարկղային մեքենայի էլեկտրոնային կտրոն: https://youtu.be/Cw4erPPGduo Նշված տնտեսավարողները մարդատար-տաքսի ավտոմոբիլներով ուղևորափոխադրումներ կարող են իրականացնել նաև էլեկտրոնային հարթակով ուղևորափոխադրման ծառայության միջոցով, որի դեպքում պատվերի վճարման էլեկտրոնային հսկիչ դրամարկղային մեքենայի էլեկտրոնային կտրոնը պատվիրատուին տրամադրում է էլեկտրոնային հարթակով ուղևորափոխադրման ծառայություն մատուցող կազմակերպությունը կամ անհատ ձեռնարկատերը։ Ի դեպ, Էլեկտրոնային հարթակով ուղևորափոխադրման ծառայության մատուցումը սահմանվել է որպես ծանուցման ենթակա գործունեության տեսակ և դրանով պայմանավորված սահմանվել է նաև պետական տուրք: