Ինչ պետք է անի քաղաքացին, եթե չունի սմարթ հեռախոս ԱՐՄԵԴ հավելվածում ընդգրկվելու համար

Պոլիկլինիկայում բժշկի կողմից բացվում են «ԱՐՄԵԴ»-ի համապատասխան դաշտերը։

Եթե քաղաքացին չի կարողանում ներբեռնել կամ գործարկել «ԱՐՄԵԴ» հավելվածը, ապա կարող է դիմել առողջության առաջնային պահպանման օղակ՝ պոլիկլինիկա կամ ամբուլատորիա, որտեղ նրան կօգնեն իրականացնել գործընթացը։ Այս մասին Ազգային ժողովում հայտարարել է առողջապահության նախարար Անահիտ Ավանեսյանը՝ առողջության համընդհանուր ապահովագրության համակարգի գործարկման ընթացքին նվիրված աշխատանքային քննարկման ժամանակ։

Նախարարը նշել է, որ եթե քաղաքացին սմարթ հեռախոս չունի, պոլիկլինիկայում նրա բժշկի կողմից բացվում են «ԱՐՄԵԴ»-ի համապատասխան դաշտերը, և բուժառուի ներկայությամբ սեղմվում է համաձայնության կոճակը։

«Եթե մարդը սմարթ հեռախոս չունի, դա չի նշանակում, որ նա չի կարող օգտվել առողջապահական երաշխիքներից։ Այդ հարցում որևէ խոչընդոտ չկա»,- ընդգծել է Ավանեսյանը։

Նա նաև հավելել է, որ նույնիսկ այն դեպքում, երբ քաղաքացին չի հասցրել ակտիվացնել հավելվածը կամ համաձայնություն տալ, բայց շտապօգնության միջոցով տեղափոխվել է հիվանդանոց, դա ևս չի խոչընդոտի բուժօգնություն ստանալուն։

«Այդ պահին հիվանդանոցային այցի շրջանակում հաստատումը կիրականացվի, և քաղաքացին կստանա անհրաժեշտ բուժօգնությունը»,- նշել է առողջապահության նախարարը։