Բրազիլիայում սուրճի բերքատվության նվազումը կարող է ամբողջ աշխարհում սուրճի գների կտրուկ աճի պատճառ դառնալ,- գրում է The Wall Street Journal-ը:
Բրազիլիայում սուրճի բերքը ավանդաբար կապված է երկամյա ցիկլերի հետ, երբ ֆերմերները մեծ քանակությամբ արաբիկա են հավաքում զույգ թվով տարիների ընթացքում: Սակայն անցյալ տարի պլանտացիաները տուժել են նախ երաշտից, ապա ցրտահարությունից, ինչը գործնականում զրկել է նրանց հարուստ բերքի հույսերից,- փոխանցում է ՏԱՍՍ-ը։ Բացասական սպասումների պատճառով 2021 թվականին սուրճի ֆյուչերսներն արդեն սկսել են գերազանցել վերջին 10 տարվա ռեկորդները։ Բրազիլական արաբիկայի մեկ ֆունտի արժեքը բարձրացել է մինչև 2,58 դոլար և կայունացել 2,23 դոլարի շուրջ, ինչը ավելի բարձր է, քան նախորդ տարիներին։
Բացի Բրազիլիայից, վատ եղանակից տուժել են նաև Կոլումբիայի պլանտացիաները, որը նույնպես սուրճի ազդեցիկ արտահանող է համաշխարհային շուկայում։ Ստեղծված իրավիճակը սպառնում է ընդհատել միջազգային մասշտաբով սուրճի մատակարարումը։ Խնդիրներին ավելանում են ոչ միայն բերքատվության անկումը, այլև համաշխարհային լոգիստիկայի դժվարությունները և փոխադրումների արժեքի բարձրացումը։ Սուրճի միջազգային կազմակերպության գնահատականներով ՝ այս ըմպելիքի սպառման ծավալը համաշխարհային մասշտաբով միայն կաճի ՝ առաջ անցնելով արտադրության տեմպերից։
