Հունվար-սեպտեմբերին Հայաստանի տնտեսական ակտիվության ցուցանիշն աճել է 9.7%-ով

2023թ. հունվար-սեպտեմբեր ամիսներին նախորդ տարվա համադրելի ժամանակահատվածի համեմատ Հայաստանում տնտեսական ակտիվության ցուցանիշն ավելացել է 9.7%-ով, իսկ 2023թ. սեպտեմբերին 2022թ. սեպտեմբերի համեմատ ցուցանիշն ավելացել է 5.6%-ով: Վիճակագրական կոմիտեի կողմից հրապարակված ՀՀ սոցիալ-տնտեսական վիճակը բնութագրող ընթացիկ օպերատիվ ամփոփմամբ ստացված նախնական հիմնական մակրոտնտեսական ցուցանիշների համաձայն՝ 2023թ. հունվար-սեպտեմբերին նախորդ տարվա համադրելի ժամանակահատվածի համեմատ գյուղատնտեսության համախառն արտադրանքի ծավալն ավելացել է 1.7%-ով, շինարարության ծավալը` 17%-ով, իսկ արդյունաբերական արտադրանքի ծավալը նվազել է 0.6%-ով։ Առեւտրի շրջանառությունը հաշվետու ամիսների տվյալներով ավելացել է 23.3%-ով, իսկ ծառայությունների ծավալն առանց առեւտրի՝ 13.4%-ով: Էլեկտրաէներգիայի արտադրությունը նվազել է 2.8%-ով: Սպառողական գների ինդեքսը հաշվետու ժամանակահատվածում աճել է 2.8%-ով, իսկ արդյունաբերական արտադրանքի գների ինդեքսը` 1.3%-ով: Արտաքին առեւտրաշրջանառության ծավալը հաշվետու ժամանակահատվածում ավելացել է 47.2%-ով: Ընդ որում, արտահանման ծավալն ավելացել է 48.5%-ով, իսկ ներմուծման ծավալը՝ 46.4%-ով: