«Պարի Սեն Ժերմենի» պաշտպան Մարկինյոսը նոր պայմանագիր կկնքի ֆրանսիական ակումբի հետ։ Այս մասին հայտնում է L’Équipe հրատարակությունը։ Աղբյուրի համաձայն ՝ բրազիլացի պաշտպանը ՊՍԺ-ի հետ նոր պայմանագիր կկնքի, որը նախատեսված կլինի մինչև 2026 թվականը ՝ ևս մեկ մրցաշրջանով երկարաձգելու հնարավորությամբ։ Հաղորդվում է նաև, որ Ֆրանսիայի մայրաքաղաքի ակումբի նախագահ Նասեր Ալ-Խելաիֆին ցանկանում է, որ Մարկինյոսը կարիերան ավարտի ՊՍԺ-ում։Բրազիլացին փարիզցիների կազմում հանդես է գալիս 2013 թվականից։ Մինչ այդ նա հանդես է եկել իտալական «Ռոմայում»։ Ֆրանսիայի առաջնության ընթացիկ մրցաշրջանում պաշտպանը մասնակցել է 21 հանդիպման, որոնցում կարողացել է մեկ գոլի հեղինակ դառնալ։ Ըստ Transfermarkt-ի ՝ Մարկինյոսի «շուկայական արժեքը» կազմում է 70 մլն եվրո:
Ավելի վաղ ՊՍԺ-ն հաստատել էր, որ ակումբը նոր պայմանագիր է քննարկում Լիոնել Մեսսիի հետ։
