Կառավարությունն ընդունել է որոշում, ըստ որի ՀՀ բեռնափոխադրող ընկերությունների համար բեռների տեղափոխմանն առնչվող լոգիստիկ ենթակառուցվածքներն առավել հասանելի կդառնան, կխթանվի միջազգային շուկա հայկական արտադրության ապրանքների արտահանումը եւ կավելանան բեռնափոխադրումների ծավալները,- գրում է Banks.am-ը։
Որոշմամբ առաջարկվում է ՀՀ բեռնափոխադրումների շրջանում առաջացող խնդիրների նվազեցման նպատակով բեռնափոխադրումների՝ ՌԴ-ից ՀՀ միակ գործող ցամաքային ուղուն այլընտրանքային` լաստանավով եւ/կամ նավով տեղափոխման ծախսերի փոխհատուցում։
«Լաստանավով եւ/կամ նավով տեղափոխման ծախսերի փոխհատուցումը նոր խթան կհանդիսանա ՀՀ տնտեսության համար, ինչպես նաեւ արժանի մրցակցություն կապահովի Վերին Լարսին։
Հիմնավորման համաձայն՝ Ստեփանծմինդա-Լարս ցամաքային ուղուն որպես այլընտրանք դիտարկվող լաստանավի եւ/կամ նավի օգտագործումը առավել թանկ է բեռնափոխադրողների համար, եւ կարող է նվազեցնել հայկական արտադրանքի մրցունակությունն արտաքին շուկաներում: Ուստի բեռնափոխադրումների նշված այլընտրանքային միջոցի օգտագործման հետեւանքով առաջացող ծախսերի փոխհատուցումը կառավարության կողմից կարող է էականորեն նվազեցնել առկա խոչընդոտները»,- ասված է որոշման մեջ:
Նախատեսվում է՝ օպերատորի կողմից լաստանավով կամ նավով Նովոռոսիյսկ-Բաթումի-Նովոռոսիյսկ եւ/կամ Փոթի-Կովկաս նավահանգիստ-Փոթի ուղղությամբ շահառուներին բեռների տեղափոխման ծառայության մատուցման արժեքի փոխհատուցման նպատակով օպերատորին տրամադրվող գումարի չափը կազմում է Նովոռոսիյսկ-Բաթումի-Նովոռոսիյսկ կամ Փոթի-Կովկաս նավահանգիստ-Փոթի մեկ չվերթի համար 120,000,000 ՀՀ դրամ՝ անկախ հանգամանքից, թե տվյալ չվերթում քանի շահառուի է մատուցվել ծառայություն։
