Հեղուկ բնական գազի խոշոր առևտրականները հարյուր միլիոնավոր դոլարների վնասներ են կրում մի քանի երկրներում կայանների անջատումների պատճառով:
ԱՄՆ-ում, Նիգերիայում և Ավստրալիայում LNG գործարաններում հանկարծակի խափանումները ստիպում են թրեյդերներին, այդ թվում ՝ BP-ին և Shell-ին, ավելի շատ վճարել այլընտրանքային մատակարարումների համար,- գրում է Reuters-ը։
Արդյունաբերական աղբյուրները գործակալությանը հայտնել են, որ BP-ն, մասնավորապես, ավելի քան 500 մլն դոլարի վնաս է կրել հունիսին Տեխասում գտնվող Freeport LNG գործարանի անսպասելի փակումից հետո։
Վառելիքաէներգետիկ համալիրում տեխնոլոգիաների զարգացման ինստիտուտի փորձագետ Կիրիլ Ռոդիոնովը նույնպես խոսել է գազի շուկայում տիրող իրավիճակի մասին։
«Իզվեստիա» թերթին տված հարցազրույցում նա կարծիք է հայտնել, որ Եվրոպայում LNG ներմուծման կտրուկ աճը կարող է հանգեցնել աշխարհի այլ տարածաշրջանների սպառողների համար հումքի հասանելիության նվազմանը։
Նրա խոսքով, գալիք ձմռանը LNG շուկայում միջտարածաշրջանային մրցակցությունը կբարձրացնի գները։
