ԱՄՆ-ը Մերձավոր Արևելք է տեղափոխել 68 ռազմական ինքնաթիռ՝ հնարավոր գործողությունների ֆոնին

CBS հեռուստաընկերությունը պնդում է, որ գործողությունը կարող է սկսվել արդեն փետրվարի 21-ին։

Միացյալ Նահանգները վերջին երեք օրում Մերձավոր Արևելքի պոտենցիալ ռազմական գործողությունների թատերաբեմին ավելի մոտ է տեղակայել 39 լիցքավորող և 29 ծանր ռազմատրանսպորտային ինքնաթիռ։ Այս մասին հայտնում է ՏԱՍՍ-ը։

Նշվում է, որ տեղափոխված ինքնաթիռների թվում են նաև Boeing C-17 Globemaster III ծանր ռազմատրանսպորտային ինքնաթիռներ։ Բացի այդ, ԱՄՆ ռազմաօդային ուժերը տարածաշրջան են ուղարկել հեռահար թռիչքային հայտնաբերման և կառավարման (AWACS) ինքնաթիռ։

Վաշինգտոնի Նոր ամերիկյան անվտանգության կենտրոնի (CNAS) ռազմավարական փորձագետ Բեքի Վասերի գնահատմամբ՝ ԱՄՆ-ը տարածաշրջանում ձևավորել է այնպիսի ուժային խմբավորում, որն անհրաժեշտ է տևական ռազմական արշավ իրականացնելու համար։ Նրա խոսքով՝ ուժերի կուտակման նման տեմպը չի կարելի դիտարկել որպես դատարկ սպառնալիք։

The Wall Street Journal-ը, հղում անելով իր աղբյուրներին, հայտնել է, որ Վաշինգտոնը քննարկում է Իրանի ռազմական և կառավարական օբյեկտներին սահմանափակ հարված հասցնելու հնարավորությունը։ Նպատակը, ըստ հրապարակման, Թեհրանին դրդելն է ընդունել ԱՄՆ-ի համար շահավետ միջուկային գործարքի պայմաններ՝ միաժամանակ խուսափելով լիամասշտաբ ռազմական գործողությունից։ Աղբյուրների փոխանցմամբ՝ նման հարվածը կարող է իրականացվել մի քանի օրվա ընթացքում։

CBS հեռուստաընկերությունը պնդում է, որ գործողությունը կարող է սկսվել արդեն փետրվարի 21-ին։

Հիշեցնենք, որ փետրվարի 17-ին Ժնևում Օմանի միջնորդությամբ տեղի է ունեցել ԱՄՆ-ի և Իրանի միջև միջուկային դոսյեի շուրջ բանակցությունների երկրորդ փուլը։ Իրանի ԱԳՆ-ում հայտարարել են մի շարք հարցերի շուրջ փոխըմբռնման մասին, որոնք կարող են ներառվել ապագա համաձայնագրում։ Վաշինգտոնը նշել է, որ խորհրդակցությունները անցել են դրական մթնոլորտում, սակայն Թեհրանը դեռ պատրաստ չէ ընդունել Սպիտակ տան կողմից առաջ քաշված մի շարք պայմաններ։

Ավելի վաղ ԱՄՆ-ը և Իսրայելը հայտարարել էին, որ Իրանը պետք է հրաժարվի ոչ միայն միջուկային ծրագրի զարգացումից, այլ նաև բալիստիկ հրթիռների արտադրությունից և Մերձավոր Արևելքում պրոիրանական ուժերին աջակցելուց։