ԱՄՆ-ն սառեցնում է ներգաղթային վիզաների տրամադրումը 75 երկրի համար, այդ թվում՝ Հայաստանի

Սահմանափակումները ուժի մեջ կմտնեն հունվարի 21-ից:

ԱՄՆ Պետդեպարտամենտը որոշում է կայացրել սառեցնել ներգաղթային վիզաների տրամադրման գործընթացը 75 երկրի քաղաքացիների համար, այդ թվում՝ Հայաստանի և Ադրբեջանի։ Այս մասին հաղորդում է Fox News-ը։

Սահմանափակումը վերաբերում է բացառապես ներգաղթային վիզաներին, որոնք նախատեսված են ԱՄՆ մշտական բնակության իրավունք ստանալու համար։ Որոշման նպատակն է նվազեցնել այն դիմորդների թիվը, որոնք կարող են հետագայում դառնալ ԱՄՆ-ի համար հանրային ֆինանսական բեռ։

Fox News-ի տվյալներով՝ սահմանափակումների ցանկում ընդգրկված են նաև Սոմալին, Ռուսաստանը, Աֆղանստանը, Բրազիլիան, Իրանը, Իրաքը, Եգիպտոսը, Նիգերիան, Թաիլանդը, Եմենը և մի շարք այլ երկրներ։

Սահմանափակումները ուժի մեջ կմտնեն հունվարի 21-ից և կգործեն անորոշ ժամկետով՝ մինչև Պետդեպարտամենտը ամբողջական վերանայում իրականացնի ներգաղթային վիզաների տրամադրման քաղաքականության վերաբերյալ։

Միևնույն ժամանակ նշվում է, որ որոշումը չի տարածվում ոչ ներգաղթային վիզաների վրա․ ԱՄՆ հյուպատոսությունները կշարունակեն առանց ընդհատումների տրամադրել զբոսաշրջային, ուսումնական և այլ ժամանակավոր վիզաներ։