ԱՄՆ ընկերությունը սկսել է TRIPP ծրագրի տեղանքի ուսումնասիրությունը Հայաստանում

TRIPP ծրագրի շրջանակում իրականացվող աշխատանքները դիտարկվում են որպես ենթակառուցվածքային զարգացման նախապատրաստական փուլ։

ՀՀ-ում ԱՄՆ դեսպանատնից հայտնում են, որ ԱՄՆ պետքարտուղարության «Գլոբալ ենթակառուցվածքների ու ներդրումների շուրջ գործակցության հիմնադրամի» պատվիրակմամբ Հայաստան է այցելել ամերիկյան AECOM ճարտարագիտա-խորհրդատվական ընկերության թիմը՝ TRIPP ծրագրի շրջանակում տեղանքի հետազոտման աշխատանքներ սկսելու նպատակով։

Նշվում է, որ աշխատանքները ներառելու են տեխնիկատնտեսական գնահատում և առաջարկների մշակում՝ երկաթուղային և այլ ենթակառուցվածքների ձևավորման վերաբերյալ։ Այդ գործընթացը նախատեսված է աջակցելու ենթակառուցվածքային նախագծերի նախագծման փուլին։

Ըստ դեսպանատան հաղորդագրության՝ իրականացվող ուսումնասիրությունները նպատակ ունեն նպաստել Հայաստանի երկարաժամկետ տնտեսական աճին, փոխկապակցվածության բարձրացմանը և տարածաշրջանային ինտեգրման խթանմանը։

TRIPP ծրագրի շրջանակում իրականացվող աշխատանքները դիտարկվում են որպես ենթակառուցվածքային զարգացման նախապատրաստական փուլ՝ միջազգային փորձի ներգրավմամբ։