«Թրամփի ճանապարհը» կարող է ազդել Հայաստանի՝ ԵԱՏՄ-ին անդամակցության վրա. Կոպիրկին

Կոպիրկինի գնահատմամբ՝ հետագա զարգացումները պետք է հաշվի առնեն տարածաշրջանի բոլոր շահագրգիռ երկրների և նրանց հարևանների շահերը։

Ռուսաստանը ուշադիր հետևում է Վաշինգտոնում հայտարարված «Թրամփի ճանապարհ միջազգային խաղաղության և բարգավաճման համար» հայ-ամերիկյան նախագծի շուրջ զարգացումներին։ Այդ մասին «Ноев Ковчег» թերթին տված հարցազրույցում հայտարարել է Հայաստանում Ռուսաստանի Դաշնության դեսպան Սերգեյ Կոպիրկինը։

Դեսպանի խոսքով՝ մինչ այս պահը նախաձեռնության վերաբերյալ հայտնի է միայն դրա անվանումը, իսկ գործնական իրականացման ուղղությամբ աշխատանքներ դեռ չեն սկսվել։ Նա նշել է, որ Ռուսաստանի դիրքորոշումը կհստակեցվի այն փուլում, երբ նախաձեռնությունը ստանա կոնկրետ բովանդակություն։

Կոպիրկինը նաև ընդգծել է, որ նախագիծը կարող է ազդեցություն ունենալ Հայաստանի՝ Եվրասիական տնտեսական միությանը անդամակցության վրա, քանի որ Հայաստանի տարածքով ապրանքների տարանցման կարգավորումները ենթակա են ԵԱՏՄ իրավական դաշտին։

ՌԴ դեսպանը հայտնել է, որ Ռուսաստանը պատրաստ է հայ գործընկերների հետ անցկացնել առարկայական խորհրդակցություններ։ Նրա խոսքով՝ Մոսկվան շարունակաբար աջակցել է Հարավային Կովկասում տրանսպորտային կապերի ապաշրջափակմանը, հատկապես հաշվի առնելով, որ այդ գործընթացների հիմքում ընկած են 2020–2022 թվականներին Ռուսաստանի, Հայաստանի և Ադրբեջանի ղեկավարների միջև ձեռք բերված եռակողմ համաձայնությունները։

Կոպիրկինի գնահատմամբ՝ հետագա զարգացումները պետք է հաշվի առնեն տարածաշրջանի բոլոր շահագրգիռ երկրների և նրանց հարևանների շահերը։