Tesla-ն գործարկել է առանց ղեկի ու ոտնակների Cybercab

Առաջին սերիական Tesla Cybercab-ը դուրս է եկել Տեխասի գործարանի կոնվեյերից։

Այս մասին X սոցիալական հարթակում հայտնել է Tesla-ի ղեկավար Իլոն Մասկը։

Նոր երկտեղանի էլեկտրամոբիլը չունի ղեկ և ոտնակներ․ վարորդի փոխարեն գործում է ավտոպիլոտային համակարգը։ Cybercab-ը դարձել է Tesla-ի ռոբոտաքսի նախագծի հաջորդ փուլը։

Ի տարբերություն ներկայիս անօդաչու տարբերակների, օրինակ՝ Tesla Model Y-ի, որոնք մեծ մասամբ պահանջում են «անվտանգության դիտորդի» ներկայություն, նոր մոդելը նախատեսված է ամբողջությամբ ավտոմատ կառավարման համար՝ առանց ձեռքով վարելու հնարավորության։ Սա, սակայն, առաջացնում է հիմնական հարցերը, քանի որ Tesla-ի ներկայիս Full Self-Driving (FSD) համակարգը պաշտոնապես դասակարգվում է որպես SAE սանդղակի Level 2 և պահանջում է վարորդի մշտական վերահսկողություն։

Մասկը հայտնել է նաև մոտավոր մեկնարկային գինը՝ շուրջ 30 հազար դոլար։ Նրա խոսքով՝ ընկերությունը ձգտում է Cybercab-ը դարձնել շահագործման առումով ամենաէժան տրանսպորտային միջոցներից մեկը։ Ավելի վաղ նա հայտարարել էր, որ նպատակ ունեն իջեցնել ընդհանուր սեփականության արժեքը մինչև մեկ մղոնի դիմաց 0.20 դոլար՝ ներառյալ լիցքավորումը, ապահովագրությունն ու ամորտիզացիան։

Ենթադրվում է, որ առաջին հաճախորդները կլինեն ռայդշերինգի ծառայությունները՝ Uber-ը և Lyft-ը։ Հեռանկարում մոդելը կարող է առաջարկվել նաև մասնավոր գնորդներին, ինչը տեսականորեն կարող է փոխել փոխադրումների շուկան։

Cybercab-ի ինտերիերը մինիմալիստական է՝ երկու նստատեղ և կենտրոնական սենսորային էկրան։

Չնայած արտադրության մեկնարկին՝ նախագիծը շարունակում է քննարկումների առարկա լինել։ Նույնիսկ Տեխասի Օսթին քաղաքում գործող Tesla-ի սահմանափակ ռոբոտաքսի պարկը ներկայումս աշխատում է օպերատորների վերահսկողությամբ, և արձանագրվել են ցածր արագությամբ միջադեպեր։

Բացի այդ, Մասկը նախկինում նշել էր, որ Cybercab-ի արտադրության տեմպերը սկզբնական փուլում կլինեն դանդաղ՝ նախագծի նորարարական բնույթի պատճառով։