S&P Global-ը Հայաստանի վարկանիշի հեռանկարը դարձրել է «դրական»

«Դրական» հեռանկարը նշանակում է, որ հաջորդ վերանայումների ընթացքում առկա է վարկանիշի բարձրացման հավանականություն։

Միջազգային հեղինակավոր S&P Global վարկանիշային գործակալությունը վերանայել է Հայաստանի վարկանիշի հեռանկարը՝ այն դարձնելով «դրական», և հաստատել է երկրի վարկանիշը «BB-» մակարդակում։ Այս մասին տեղեկացնում են ՀՀ ֆինանսների նախարարությունից։

Այս որոշումը հաջորդում է Fitch Ratings-ի կողմից Հայաստանի վարկանիշի նմանատիպ բարելավմանը՝ արձանագրելով երկրի նկատմամբ միջազգային տնտեսական վստահության շարունակական դրական միտումը։

Հեռանկարի վերանայումը, ըստ հաղորդագրության, արտացոլում է տարածաշրջանային իրավիճակի բարելավման ներուժը, մասնավորապես՝ Հայաստանի և Ադրբեջանի միջև հարաբերությունների կարգավորման գործընթացում արձանագրված առաջընթացը։

Գործակալությունը նաև նշել է Հայաստանի տնտեսական աճի դրական հեռանկարը, ինչպես նաև արտաքին ցնցումները կլանելու կարողությունը՝ պայմանավորված միջազգային պահուստների բարձր մակարդակով և ճկուն փոխարժեքային քաղաքականությամբ։

S&P Global-ի գնահատմամբ՝ վարկանիշը հիմնված է Կառավարության հետևողական հարկաբյուջետային քաղաքականության, մեղմացող ռիսկերի և ամուր արտարժութային դիրքերի վրա։

«Դրական» հեռանկարը նշանակում է, որ հաջորդ վերանայումների ընթացքում առկա է վարկանիշի բարձրացման հավանականություն։