Հեռավար գործարքներ, նոր պահանջներ և շուկայի վիճակագրություն․ կարևոր շեշտադրումներ՝ անշարժ գույքի ոլորտում

ՀՀ կադաստրի կոմիտեն հայտարարում է անշարժ գույքի շուկայի կարգավորման և ակտիվացմանն ուղղված մի շարք կարևոր փոփոխությունների մասին։

Հունվարի 19-ին լրագրողների հետ հանդիպման ընթացքում Կոմիտեի նախագահ Սուրեն Թովմասյանը ներկայացրել է ինչպես արտերկրում գտնվող անձանց համար նոր հնարավորությունները, այնպես էլ շուկայի վերահսկողության խստացման և 2025 թվականի վիճակագրական միտումները։

Արտերկրում գտնվող անձանց համար անշարժ գույքի առուվաճառքը դառնում է ամբողջությամբ հեռավար
Մշակվել է փորձնական նախաձեռնություն, որի շրջանակում արտերկրում բնակվող անձինք կարող են էլեկտրոնային հարթակում ստորագրել առուվաճառքի պայմանագիրը, ստանալ սեփականության իրավունքի վկայականը և առանց լիազորագրի կամ Հայաստան գալու իրականացնել գործարքը՝ բանկի հիփոթեքային ֆինանսավորմամբ։

Անշարժ գույքի շուկայում կխստացվեն պահանջները և կկարգավորվի ռիելթորների գործունեությունը
2026 թվականի երկրորդ կեսից ռիելթորների համար կսահմանվի պարտադիր ատեստավորում, կներդրվի անշարժ գույքի կառավարման ինստիտուտ, ինչպես նաև էլեկտրոնային համակարգ, որտեղ գույքը նախ կստուգվի որակական չափորոշիչներով և միայն հետո կարող է վաճառվել կամ հանձնվել վարձակալության։

2025-ին անշարժ գույքի գործարքների ընդհանուր թիվը նվազել է, հատկապես առաջնային շուկայում
2025 թվականին իրականացվել է 244 հազար գործարք՝ նախորդ տարվա 248,9 հազարի դիմաց, իսկ առաջնային շուկայում գործարքները նվազել են մինչև 16,3 հազար՝ Երևանի հիփոթեքային եկամտահարկի վերադարձի ծրագրի աստիճանական դադարեցման հետևանքով։