Նիկոլ Փաշինյանը կոչ է արել չխեղաթյուրել պատմական փաստերը

Երբ Ադրբեջանի նախագահի ասածը, ինձ ուղղված հարցի մեջ դնելով, սխալ եք ձևակերպում, արդեն իսկ իմ ցանկացած պատասխան սխալ է, քանի դեռ հարցի բազան չի ճշտվել: Այդ մասին խորհրդարանական ճեպազրույցի ժամանակ ասաց վարչապետ Նիկոլ Փաշինյանը՝ պատասխանելով հարցին, թե չնայած խաղաղության հաստատմանը՝ Ադրբեջանի նախագահը կոշտ հռետորաբանություն է գործադրում՝ Սևանն անվանելով Գյոյչա, Վարդենիսը՝ Բասարգեչար:

Փաշինյանը ճշգրտեց հարցի բազան՝ պարզաբանելով. <<Ադրբեջանի նախագահն ասե՞լ է, որ ցարական ժամանակի քարտեզի մեջ Սևան չի եղել, ուրիշ անուն չի եղել, հիմա ես էլ ասում եմ՝ այդ նույն քարտեզի մեջ Հայաստան կա, Ադրբեջան չկա:

Հիմա Ադրբեջանի նախագահն ասել է, որ չգիտեմ՝ որ թվի քարտեզում Սևան չի գրված, գրված է ուրիշ անուն: Ե՞վ: Ես էլ հարց եմ տալիս, ասում եմ՝ որ հետ ենք գնում, մինչև ո՞ր թիվը հետ գնանք>>,- ասաց նա: