Աննախադեպ վատ օդի որակ Երևանում․ ինչ առողջական խնդիրներ կարող են ի հայտ գալ․ ինչպես կանխարգելել

Ամբողջ Հայաստանը ծխի մեջ է:

Երևանում` կյանքին սպառնացող օդի աղտոտվածության մակարդակն աննախադեպ բարձր է՝ հասնելով Առողջապահության համաշխարհային կազմակերպության չափանիշներից 20-30 անգամ բարձր մակարդակի: Այս մասին Tert.am-ի հետ զրույցում ասել է բնապահպան Ինգա Զարաֆյանը:

Զարաֆայնի խոսքով՝ քաղաքում PM2.5, որը չափում է մասնիկային նյութի կոնցենտրացիան, երեք շաբաթ է, ինչ հասել է  վերին շեմին:

Բնապահպանը նշում է՝  օդի աղտոտվածության մակարդակի մասին տվյալներ կարելի է գտնել https://www.iqair.com/armenia/yerevan միջազգային կայքում, որն ամեն օր հայաստանյան համապատասխան գերատեսչություններին ու տարբեր կազմակերպություններին թարմ տվյալներ է ներկայացնում՝ մեր երկրում օդի աղտոտվածության վերաբերյալ:

Զաֆարյանն իր մտահոգությունն է հայտնում՝ ասելով. «Վերջին երեք շաբաթների ընթացքում միաջազգային այդ կայքը նախազգուշացում է տվել կարմիր գույնով, որ Երևանի օդի աղտոտվածության մակարդակը՝ մարդկանց առողջության համար շատ վտանգավոր է: Բայց համապատասխան կառույցներն անտեսել են ներկայացված տվյալներն ու մեր քաղաքացիներին որևէ կերպ չեն զգուշացրել դրա մասին»:

Բնապահպանի դիտարկմամբ՝ այստեղ մեծ աշխատանք ունի կատարելու Առողջապահության նախարարությունը, որը, չգիտես ինչու, ըստ Զարաֆյանի, ոչինչ չի անում. «Ես, չգիտեմ՝ Առողջապահության նախարարությունն ինչպես է պատկերացնում իր պրոֆիլակտիկ աշխատանքը, բայց իրենց պարտավորությունն է մեր քաղաքացիներին իրազեկել, թե ինչպես վարվեն այս օրերին: Չկան որևէ նախազգուշացնող հայտարարություններ ու ցուցումներ:

Չնայած նրա, որ Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ը բացատրել է, որ իրավիճակը պայմանավորված է սառը և տաք օդային զանգվածների միջև տուրբուլենտության բացակայությամբ, բնապահպանը մեկ այլ կարևոր երևույթի վրա է ուշադրություն դարձնում. «Մարդիկ ամենուրեք տերևներ են այրում, միաժամանակ, կրակի մեջ նետելով  տարաբնույթ առարկաներ, որոնց այրման հետևանքով առաջանում են առողջության համար վտանգավոր նյութեր։ Ավելին, Երևանում կան բազմաթիվ բաց հանքեր և քարի վերամշակման արտադրամասեր, որոնք նույնպես նպաստում են օդի աղտոտմանը»:

Զարաֆյանի դիտարկմամբ՝ ամբողջ Հայաստանը ծխի մեջ է: «Փորձեք դուրս գալ մայրաքաղաքից: Փոխարենը շնչես մաքուր օդ, շնչում ես այրվող տերևների ծխի հոտ ու սկսում ես խեղդվել: Այն բնակավայրերում, որտեղ շատ են այգիները, այդ հատվածներում առավել ևս վատ վիճակ է»,- ասում է զրուցակիցը՝ ընդգծելով՝ իրավիճակը մարդկանց մոտ կարող է հանգեցնել սրտանոթային և թոքային հիվանդություններից վաղաժամ մահացությունների և քաղցկեղի աճի:

«Ես չգիտեմ՝ էլ ինչքան պետք  բարձրանա, որ հասկանանք՝ ինչ պետք է անենք: Մինչև հասարակական կազմակերպությունները չահազանգեցին ու չբարձրաձայնեցին, պատկան մարմինները չխոսեցին դրա մասին՝ քաղաքացիներին խորհուրդներ տալով ու զգուշացնելով օդի աղտոտվածության մասին: Բայց, սա քիչ է, պետք է մեծ աշխատանքներ տանել այս ամենը կանխելու համար»,- եզրափակեց Զարաֆյանը:

*նկարը պատրաստելիս օգտագործվել է նաև ԱԲ