Հայաստանում 335 հազար մարդ անհուսալի վարկ ունի. աջակցության ծրագրով պետբյուջեից շուրջ 1 մլրդ է տրամադրվել

2024թ. հոկտեմբերի դրությամբ անհուսալի վարկ ունեցող ֆիզիկական անձ վարկառուների թիվը շուրջ 341 հազար էր։

Կառավարությունը ՀՀ պետբյուջեի հաշվին շուրջ մեկ մլրդ դրամ  է տրամադրվել բանկերին անհուսալի վարկեր ունեցող ՀՀ քաղաքացիների վարկային պարտավորությունները մարելու համար: Այս մասին NEWS.am-ը տեղեկացել է՝ ամփոփելով գրավոր հարցմանն ի պատասխան ՀՀ աշխատանքի և սոցիալական հարցերի նախարարությունից ստացված տվյալները:

Նախարարությունից մասնավորապես տեղեկացրել են, որ «Անհուսալի վարկեր ունեցող անձանց տնտեսական ակտիվության խթանման» միջոցառման շրջանակում 2025 թվականի հոկտեմբերի 23-ի դրությամբ հաշվառված է 19,136 դիմում, իսկ համակարգում հաստատված կարգավիճակ ունի 6786 դիմում։

««Անհուսալի վարկեր ունեցող անձանց տնտեսական ակտիվության խթանման» միջոցառման շրջանակում 2025 թվականի փետրվար-հոկտեմբեր ամիսներին  ըստ համապատասխան տեղեկատվական շտեմարանում առկա տեղեկատվության՝ ծախսվել է շուրջ 985 մլն դրամ»,-հայտնել են նախարարությունից:

ՀՀ կենտրոնական բանկից էլ տեղեկացրել են, որ 2025 թվականի հոկտեմբերի դրությամբ Հայաստանում անհուսալի վարկ ունեցող ֆիզիկական անձանց քանակը կազմել է 335 հազար մարդ, իսկ վարկային բեռը (մայր գումարի, հաշվեգրած տոկոսների և այլ պարտավորությունների գումարների մնացորդը)՝ 673 մլրդ ՀՀ դրամ:

Համեմատության համար նշենք, որ 2024թ. հոկտեմբերի դրությամբ անհուսալի վարկ ունեցող ֆիզիկական անձ վարկառուների թիվը շուրջ 341 հազար էր, իսկ  վարկային բեռը՝ շուրջ 642 մլրդ դրամ։

Հիշեցնենք, որ 2025թ. փետրվարի 1-ից Հայաստանում մեկնարկել է անհուսալի վարկեր ունեցող անձանց աջակցության ծրագիրը:

Ծրագրից կարող են օգտվել Կենտրոնական բանկի կողմից լիցենզավորված բանկերում և վարկային կազմակերպություններում վարկային պարտավորություն ունեցող այն անձինք, ում ունեցած բոլոր վարկերի մայր գումարների հանրագումարը դիմելու օրվա դրությամբ փոքր է 1 մլն դրամից, և այդ վարկերը դասակարգված են անհուսալի դասով առնվազն 3 տարի։

Ծրագրին կարող են դիմել նրանք, ովքեր ունեն ֆորմալ, այսինքն՝ գրանցված զբաղվածություն։ Աջակցությունը տրամադրվում է աշխատավարձից վարկի գծով հաշվարկված եկամտային հարկի գումարի չափով և ուղղվում է շահառուի անհուսալի վարկային պարտավորության մարմանը՝ առավելագույնը 24 ամիս ժամկետով` սկսած շահառու դառնալուն հաջորդող ամսվա 1-ից։

Շահառու ճանաչվելու դեպքում աշխատավարձից վարկի սպասարկման համար բռնագանձվող գումարի չափը սահմանվում է 20%՝ 24 ամիս ժամկետով (այժմ սահմանված մինչև 50%-ի փոխարեն)։