Գերմանիայի գազի պաշարները նվազել են մինչև ռեկորդային նվազագույն մակարդակ

Ջեռուցման սեզոնի մեկնարկին գազապահեստարանները լցված էին ընդամենը 75%-ով:

Գերմանիայի ստորգետնյա գազապահեստարանները ներկայում լցված են 48.3%-ով, ինչը հունվարի սկզբի համար ամենացածր մակարդակն է վերջին բոլոր տարիների ընթացքում, ներառյալ 2022 թվականը, երբ երկրում սկսվեց էներգետիկ ճգնաժամը։ Այս մասին հաղորդում է DW-ն։

Initiative Energien Speichern կազմակերպության ներկայացուցիչ Սեբաստիան Հայներմանի խոսքով՝ գազի պաշարների մակարդակը գտնվում է «պատմականորեն ցածր» մակարդակի վրա։ Նրա տվյալներով՝ ջեռուցման սեզոնի մեկնարկին գազապահեստարանները լցված էին ընդամենը 75%-ով, իսկ դեկտեմբերյան ցուրտ եղանակը մեծացրել է պաշարների արագ սպառման ռիսկը։

Հունվարին ցածր ջերմաստիճանների պատճառով գազապահեստարանների դատարկման տեմպը գերազանցել է սովորական ցուցանիշները։ EWE էներգետիկ ընկերության ղեկավար Շտեֆան Դոլերի գնահատմամբ՝ եթե սպառման ներկայիս տեմպը շարունակվի այնպես, ինչպես անցյալ տարի, ապա մարտի վերջին պաշարները կարող են նվազել մինչև 5%։ Սակայն նա այդ սցենարը համարում է քիչ հավանական՝ նշելով, որ համաշխարհային գազի գները ներկայում չափավոր են, և Գերմանիան կարող է անհրաժեշտության դեպքում գազ ներմուծել արտերկրից։

Գերմանիայի տնտեսական գործերի և էներգետիկայի նախարարությունում ընդգծում են, որ ներկայիս իրավիճակը արտաքինից նման է 2022 թվականի ճգնաժամային փուլին, սակայն շուկայի կառուցվածքն այժմ այլ է։ Վերջին տարիներին շահագործման են հանձնվել Հյուսիսային և Բալթիկ ծովերում գտնվող հեղուկացված բնական գազի (LNG) նոր տերմինալներ, որոնք մեծացրել են մատակարարումների ճկունությունը։

Եթե նախկինում ստորգետնյա գազապահեստարանները հանդիսանում էին պակասի դեմ հիմնական ապահովագրությունը, ապա այժմ LNG ներմուծումները զգալիորեն ընդլայնել են այլընտրանքային մատակարարման հնարավորությունները։ Նախարարությունում ակնկալում են, որ գազի մատակարարումները կմնան կայուն։

Միևնույն ժամանակ, Շտեֆան Դոլերը կոչ է արել ստեղծել ռազմավարական գազի պահուստ՝ հետևելով Ավստրիայի օրինակին, որպեսզի արտակարգ իրավիճակներում՝ խողովակաշարերի վթարների կամ LNG տերմինալների փակման դեպքում, հնարավոր լինի նվազեցնել ռիսկերը։