Հունիսի 1-ից «Հին Խնձորեսկ» արգելոցի մուտքը կդառնա վճարովի

Տոմսերի վաճառքից ստացված միջոցները կուղղվեն «Հին Խնձորեսկ» պատմամշակութային արգելոցի պահպանման և զարգացման ծրագրերին։

Հունիսի 1-ից «Հին Խնձորեսկ» պատմամշակութային արգելոցի մուտքը կդառնա վճարովի։ Այս մասին հայտնում է ԿԳՄՍՆ «Պահպանության ծառայություն» պետական ոչ առևտրային կազմակերպությունը։

Նշվում է, որ դեռ նախորդ տարվանից հնավայրում իրականացվում են բարեկարգման և հարդարման աշխատանքներ՝ այցելուների համար տարածքն առավել հարմարավետ և մատչելի դարձնելու նպատակով։ Աշխատանքների շրջանակում կատարվել են տարածքի մաքրում, ընդհանուր բարեկարգում, զբոսաշրջային արահետների ձևավորում և հարդարում։

Հին և Նոր Խնձորեսկը կապող դժվարանցանելի հատվածներում կառուցվել են քարե և փայտե աստիճաններ, արահետները գծանշվել են և կահավորվել ուղղորդող ու տեղեկատվական ցուցանակներով։ Այս քայլերը նպատակ ունեն բարձրացնել այցելուների անվտանգությունն ու կողմնորոշման հնարավորությունները։

Միաժամանակ մեկնարկել են հողային աշխատանքներ տեղեկատվական մոդուլային կենտրոնի տեղադրման համար։ Ինֆորմացիոն կենտրոնը նախատեսված է այցելուներին համալիր ծառայությունների մատուցման համար, այդ թվում՝ զբոսավարական, պահպանության և անվտանգության ուղղություններով։

ԿԳՄՍՆ «Պահպանության ծառայություն» ՊՈԱԿ-ի հաղորդագրության համաձայն՝ բարեկարգման և հարդարման աշխատանքների ավարտից հետո արգելոցի մուտքը կդառնա վճարովի, իսկ տոմսերի վաճառքից ստացված միջոցները կուղղվեն «Հին Խնձորեսկ» պատմամշակութային արգելոցի պահպանման և զարգացման ծրագրերին։