Հայաստանից Գերմանիա արտահանման ծավալն աճել է ավելի քան 80 տոկոսով․ Գևորգ Պապոյան

Անդրադառնալով առաջիկայում իր՝ Մոսկվա սպասվող այցին` նախարար Պապոյանը նշեց, որ այդ այցը Գերմանիա այցի հետ չի հակադրվում։

Ընթացիկ տարում Հայաստանը դեպի Գերմանիա արտահանման ծավալների ավելի քան 80 % աճ ունի. դա տեղի է ունեցել տնտեսական մի շարք ուղղությունների հաշվին` մշակող արդյունաբերություն, հանքահումքային արտադրանք և այլն։ 

Ինչպես հաղորդում է «Արմենպրես»-ը, լրագրողների հետ զրույցում ՀՀ վարչապետի պատվիրակության կազմում Գերմանիայում գտնվող ՀՀ էկոնոմիկայի նախարար Գևորգ Պապոյանը նշեց, որ այս ուղղությամբ աշխատանքներն ակտիվացնելու համար Կառավարությունը կոնկրետ քայլեր է ձեռնարկում։ 

«Կառավարությունը նախորդ տարի ընդունել է որոշում, ըստ որի, եթե մշակող արդյունաբերության արտադրանք է արտադրվում Հայաստանում և արտահանվում է Գերմանիա և եվրոպական երկրներ, ապա պետությունը փոխհատուցում է այդ մաքսատուրքի գումարը։ Ինչո՞ւ ենք արել այդպես, որպեսզի հայկական տեքստիլ արտադրանքը, հայկական կոնյակը, մեր գինին, մեր փայլաթիթեղը մրցունակ լինեն եվրոպական շուկաներում»,֊ ասաց Պապոյանը։

Անդրադառնալով առաջիկայում իր՝ Մոսկվա սպասվող այցին` նախարար Պապոյանը նշեց, որ այդ այցը Գերմանիա այցի հետ չի հակադրվում։ 

«Մենք հենց դրանով ենք խաչմերուկ։ Դիրքավորվում ենք որպես խաղաղության խաչմերուկ։ Խոսքը մեր հավասարակշռման քաղաքականության մասին է, որ մենք ուզում ենք շատ լավ հարաբերություններ ունենալ Եվրոպական միության հետ, Ռուսաստանի Դաշնության, Մերձավոր Արևելքի երկրների հետ»,֊ ասաց Պապոյանն` ընդգծելով, որ Հայաստանը առևտրաշրջանառության ծավալի աճ ունի նաև Արաբական Միացյալ Էմիրությունների հետ։ 

Նախարարի խոսքով` Հայաստանի՝ դեպի Եվրոպա բռնած ճանապարհն այսպես թե այնպես հաջողությամբ է պսակվելու։ Նա ընդգծեց, որ այդ ճանապարհին բարելավվելու են Հայաստանի  օրենսդրությունը, ստանդարտները արտադրողականության որակը, ինչը կլինի լուրջ հաջողություն։ 

«Դա արդեն հաջողություն է, որովհետև երաշխիք է այն իմաստով, որ մենք կկարողանանք ապրանքներ և ծառայություններ արտահանել աշխարհի ցանկացած երկիր։ Եթե մենք կարող ենք ինչ֊որ ապրանք արտահանել Գերմանիա, ուրեմն դա նշանակում է, որ աշխարհի բոլոր երկրներ դա կարող ենք դա արտահանել»,-հավելեց նախարարը։