Եգիպտոսը մարտի 1-ից բարձրացնում է մուտքի վիզայի վճարը

Եգիպտոսի սահմանային անցակետերում տրամադրվող մուտքի արտակարգ վիզայի վճարը կբարձրանա՝ ներկայիս 25 ԱՄՆ դոլարից դառնալով 30 ԱՄՆ դոլար։

Նոր սակագինը կգործի 2026 թվականի մարտի 1-ից։

Հաղորդագրության համաձայն՝ որոշումը կայացվել է սահմանային անցակետերում մուտքի գործընթացների կարգավորման շրջանակում։

Եգիպտոսի զբոսաշրջային ընկերությունների պալատը կոչ է արել տուրիստական ընկերություններին ձեռնարկել անհրաժեշտ քայլեր՝ իրենց զբոսաշրջային փաթեթներն ու ծրագրերը թարմացնելու և արտասահմանյան գործընկերների հետ աշխատանքը նոր սակագներին համապատասխանեցնելու համար։

Ընդգծվում է, որ ներկայումս նկատվում է Եգիպտոս այցելող զբոսաշրջիկների հոսքի աճ և երկրի նկատմամբ պահանջարկի բարձր մակարդակ։

Նշվում է նաև, որ որոշումը միտված է զբոսաշրջության կառավարման համակարգի զարգացմանը և այցելուներին մատուցվող ծառայությունների որակի բարելավմանը, ինչը պետք է նպաստի երկրի մրցունակության բարձրացմանը թե՛ տարածաշրջանային, թե՛ միջազգային մակարդակներում։