Դեկտեմբերի 8-ի կարևոր լուրերը

Ինչ է կատարվել Հայաստանում և աշխարհում։

Արամ Ա կաթողիկոսի կոշտ գնահատականը՝ իշխանությունների հասցեին

Մեծի Տանն Կիլիկիո կաթողիկոս Արամ Առաջինը Նիկոսիայում հանդես է եկել քննադատությամբ՝ պնդելով, որ Հայաստանի իշխանություններն իրականացնում են հարձակումներ եկեղեցու և հոգևորականների նկատմամբ։ Արամ Ա-ն ընդգծել է, որ Անթիլիասը «ո՛չ» է ասում ամեն անարդարության՝ հանդես գալով հալածանքների դեմ։

Ճանապարհային իրավիճակ՝ ձմեռային պայմաններում

ՀՀ տարածքում ավտոճանապարհները հիմնականում բաց են։ Կորեայի ձորի ճանապարհը թափման վտանգի պատճառով ժամանակավորապես փակ է։ Արթիկում, Վարդենյաց լեռնանցքում և «Մեղրու սար» հատվածում տեղում է ձյուն, Սևանում՝ մառախուղ։ Վարորդներին հորդորվում է երթևեկել միայն ձմեռային անվադողերով։

Գործատուների տարանջատում՝ նոր պետական քաղաքականություն

Կառավարությունը քննարկում է գործատուներին «բարեխիղճ» և «ոչ բարեխիղճ» խմբերի բաժանելու մոտեցումը՝ աշխատողների գրանցված լինելու հիմքով։ Նախաձեռնությունը նպատակ ունի խրախուսել օրինական աշխատաշուկան և նպատակային դարձնել պետական աջակցության ծրագրերը։

Վարչապետի առաջարկը՝ պետական օրհներգը պատարագից առաջ

Նիկոլ Փաշինյանը առաջարկել է Հայաստանյայց Առաքելական Եկեղեցու տաճարներում Սուրբ և Անմահ պատարագից առաջ հնչեցնել ՀՀ պետական օրհներգը՝ «վերին և ներքին պետությունների կապը» սիմվոլիկորեն արտահայտելու համար։

Երևանում՝ հուզական ինտելեկտի զարգացման ծրագիր

Մանկապարտեզներում սկսվել է հուզական ինտելեկտի զարգացման փորձնական ծրագիր՝ 184 երեխայի մասնակցությամբ։ Դաստիարակները, օգնականներն ու հոգեբանները անցել են վերապատրաստում, իրականացվում են նաև ծնողների հետ հարցազրույցներ։

Հարձակում՝ Միհրան Հակոբյանի վրա

«Դալմա մոլ»-ի ավտոկայանատեղում տեղի է ունեցել հարձակման դեպք հանրային գործիչ Միհրան Հակոբյանի նկատմամբ։