Արշակ Սրբազանին վերագրվող տեսանյութում կիրառվել է ԱԲ, ձայնը փոփոխված է․ փաստաբան

Խոսքը ենթարկվել է փոփոխության, իսկ ձայնը վերասինխրոնացվել է տեսագրության հետ։

Արշակ Սրբազանին վերագրվող տեսանյութում առկա է արհեստական բանականության (ԱԲ) կիրառում, իսկ ձայնն ամբողջությամբ փոփոխված է։ Այս մասին հայտարարել է փաստաբան Արսեն Բաբայանը՝ «Արշակ Սրբազանի փաստաբանների ասուլիսի» ժամանակ։

Բաբայանի խոսքով՝ Չեռնոգորիայի փորձաքննության եզրակացության համաձայն՝ տեսանյութի տեխնիկական ցուցիչները ցույց են տալիս, որ ներկայացված ֆայլերը մշակված ածանցյալներ են և չեն հանդիսանում օբյեկտիվ իրականության բնօրինակ։

«Ներկայացված տեսագրություններում տեսաձայնային իրադարձությունները գնահատվում են որպես կառուցված և մանիպուլացված թվային բովանդակություն»,- նշել է նա։

Փաստաբանը հավելել է, որ փորձագետներին ուղղված հարցին՝ արդյոք տեսագրությունը չի ստեղծվել արհեստական բանականությամբ կամ տեսաբովանդակություն ստեղծելու համար նախատեսված հատուկ ծրագրերով, պատասխանվել է, որ տեխնիկական արդյունքները հակասում են այն պնդմանը, թե տեսանյութը չի ստեղծվել ԱԲ-ով։

«Մի քանի անկախ ցուցիչներ ցույց են տալիս, որ ներկայացված նյութերը հանդիսանում են մասնագիտացված ծրագրով ստեղծված կամ մանիպուլացված արդյունքներ և բնորոշ են արհեստական բանականությամբ աջակցված վերակառուցման փոփոխության»,- ասել է Բաբայանը։

Նա նաև անդրադարձել է ձայնագրությանը՝ նշելով, որ խոսքը ենթարկվել է փոփոխության, իսկ ձայնը վերասինխրոնացվել է տեսագրության հետ։