Անկանխիկ ստացման եղանակի անցնելու դիմում չներկայացրած կենսաթոշակառուի համար ՄՍԾ-ն ինքնաշխատ եղանակով ընտրել է բանկը

Խոսքը վերաբերում է նաև 14-18 տարեկան կենսաթոշակառուներին։

Ապրիլի 1-ից Հայաստանում կենսաթոշակներն ու նպաստները կվճարվեն բացառապես անկանխիկ եղանակով։ Համապատասխան որոշումն ընդունվել է ՀՀ կառավարության կողմից։

ԱՍՀ նախարարությունից հայտնում են, որ 2026 թվականի մարտի 5-ի դրությամբ այն կենսաթոշակառուների համար, ովքեր մինչ այդ կանխիկ եղանակով էին ստանում կենսաթոշակը և չէին ներկայացրել անկանխիկ ստացման եղանակի անցնելու դիմում, բանկի ընտրությունն իրականացրել է Միասնական սոցիալական ծառայությունը՝ ինքնաշխատ եղանակով՝ ծրագրային մոդուլի կիրառմամբ։

Խոսքը վերաբերում է նաև 14-18 տարեկան կենսաթոշակառուներին։

Իմանալու համար, թե որ բանկն է ընտրվել, անհրաժեշտ է մուտք գործել հետևյալ հղումով՝
https://online.ssa.am/index.php?r=pension-payer%2Findex

Այնուհետև պետք է լրացնել ՀԾՀ համարը (կամ ՀԾՀ չունենալու մասին տեղեկանքի համարը) կամ անձնագրի/նույնականացման քարտի տվյալները համապատասխան դաշտերում և սեղմել «Որոնել»։

Նախարարությունից նաև տեղեկացնում են, որ ապրիլի 1-ից կենսաթոշակներն ու նպաստները կվճարվեն արդեն բարձրացված չափերով։ Բացի այդ, անկանխիկ գործարքներից տրամադրվող 20% հետվճարի շնորհիվ կենսաթոշակի կամ նպաստի չափը կարող է ավելանալ մինչև ևս 10 000 դրամով։