Պատրաստի մետաղական արտադրանքների ներմուծման վրա 6 ամիս ժամկետով տուրք կդրվի:

Կառավարության՝ օգոստոսի 7-ի նիստին ընդունվեց Հայաստանի Հանրապետություն պողպատե ամրանների ներմուծման լիցենզավորման ընթացակարգը և հիմնական լիցենզիայի ձևը սահմանելու մասին որոշման նախագիծը:

Ըստ ՀՀ էկոնոմիկայի նախարար Գևորգ Պապոյանի՝ այն բխում է վերջերս Ազգային ժողովի ընդունած մի որոշումից, ըստ որի՝ ՀՀ 3-րդ երկրներից ներմուծվող յուրաքանչյուր 1 տոննա մետաղական արտադրանքի համար սահմանվում էր 29 հազար դրամի չափով տուրք:

«Ինչո՞ւ ենք սահմանել այդ տուրքը. որովհետև Կառավարության գործունեության արդյունքում վերջին տարիներին տարբեր գնահատականներով մինչև 150 մլն դոլար ներդրումներ են եղել, և 1000 նոր աշխատատեղ արդեն իսկ ստեղծված է, և տեղի է ունեցել սև և գունավոր մետաղների ջարդոնների օգտագործան աճ»,- ասաց նախարարը:

Շարունակելով քաղաքականությունը՝ այժմ որոշում է կայացվել, որ պատրաստի մետաղական արտադրանքների ներմուծման վրա 6 ամիս ժամկետով տուրք է դրվում:

Նախարարը նաև տեղեկացրեց, որ տասնամյակներ շարունակ մետաղական ջարդոնի անվան տակ ՀՀ-ից արտահանվում էին տարբեր հոսքագծեր, մետաղներ, ավտոմեքենաների կմախքներ, բայց Կառավարությունը որոշեց, որ տուրք է սահմանելու՝ խոչընդոտ ստեղծելով դրա արտահանման համար: Արդյունքում այդ մետաղներն սկսեցին հալեցնել և այդ տեսքով արտահանել, բայց հալեցնելու ընթացքում ստեղծվեցին ավելացված արժեք, նոր աշխատատեղեր, նոր կազմակերպություններ ու հարկեր: Կառավարությունը նոր օրենք ընդունեց, թե չեն կարող հալեցնել, այլ այն պետք է կիսապատրաստուկի տեսք ունենալ, որը բերեց նոր ներդրումների և աշխատատեղերի ստեղծման: Վերջին երրորդ փուլում՝ 2024-ին, որոշվեց, որ ՀՀ-ից որևէ տեսակի կիսապատրաստուկով մետաղական արտադրանքի արտահանումը տուրքով է հարկվելու: Արդյունքում, ըստ նախարարի, ՀՀ-ում արդեն իսկ ստեղծվել է Քարակերտի քարաձուլման գործարանը:

«Ստացվում է՝ Կառավարության գործունեության արդյունքում Հայաստանը մետաղի ջարդոն արտահանող երկրից վերածվել է պատրաստի մետաղական արտադրանքներ թողարկող, ներքին շուկան բավարարող և արտահանման հավակնություն ունեցող երկրի»,- ասաց նախարարը:

Փոխվարչապետ Մհեր Գրիգորյանը նկատեց՝ որպեսզի հանրության համար պարզ լինի, պետք է նշել, որ սա հակադեմպինգային քայլ է, իսկ խոսակցությունները, թե սա արհեստականորեն թանկացնում է ներմուծվող նմանատիպ ապրանքի գինը, ճիշտ չէ:

«Եթե հիպոթետիկ հնարավոր լինի գնահատել, որ այսօր ներմուծվողն ավելի էժան կլինի, քան արտադրողը, բոլորս պիտի հասկանանք, որ ներմուծման գինն ավելի էժան է պահվում այնքան ժամանակ, քանի դեռ դա նպաստում է տեղի արտադրության ցիկլի դադարեցմանը: Որ պահին դադարում է, այդ պահին գինը թանկանում է և դառնում է ավելի բարձր, քան տեղի արտադրողն առաջարկում է շուկային»,- ասաց փոխվարչապետը: