Lufthansa-ն կչեղարկի մոտ 900 չվերթ անձնակազմի պակասի պատճառով. Bloomberg Գերմանական խոշորագույն ավիափոխադրող Lufthansa-ն հուլիսին կչեղարկի շուրջ 900 ներքին և եվրոպական չվերթ ՝ անձնակազմի պակասի պատճառով։ Այս մասին հայտնում է Bloomberg-ը ՝ հղում կատարելով ավիաընկերության ներկայացուցչի հաղորդագրությանը։ «Ամբողջ ավիացիոն արդյունաբերությունը, հատկապես Եվրոպայում, ներկայումս տուժում է կրճատումներից: Դա վերաբերում է օդանավակայաններին, վերգետնյա սպասարկման գործակալություններին, օդային երթևեկության հսկողությանը, ինչպես նաև ավիաընկերություններին»,- ասել է փոխադրողի ներկայացուցիչը։ Ընկերությունում նշել են, որ առաջացած խնդիրները կորոնավիրուսային պանդեմիայի հետևանք են։ Եվրոպական ավիաընկերությունները ձգտում են ավելացնել նստատեղերի և թռիչքների քանակը՝ պայմանավորված համաճարակի սկզբից երկու տարի տևած ճանապարհորդական սահմանափակումների վերացումից հետո պահանջարկի աճի պատճառով: Մեկ ամիս առաջ ավիափոխադրողի գործադիր տնօրեն Կարստեն Սփորն ասել էր, որ աշխատաշուկայում տեղի ունեցած հետցնցումները զգալիորեն խաթարել են ընկերության ամառային ծրագրերը։ Նախօրեին Le Figaro-ն գրել էր, որ հունիսի 9-ին Փարիզի Շառլ դը Գոլ օդանավակայանում կչեղարկվի անձնակազմի գործադուլի պատճառով 7-ից մինչև 14-ը նախատեսված չվերթերի մոտ մեկ քառորդը: