Հայաստանի Հանրապետությունը հանձնառություն է ստանձնել արդիականացնելու թափոնների կառավարման ոլորտը Հայաստան-Եվրոպական Միություն համապարփակ և ընդլայնված գործընկերության համաձայնագրի շրջանակում։
Ըստ համաձայնագրի, մինչև 2024 թվականը Հայաստանում պետք է ներդրվի Արտադրողի ընդլայնված պատասխանատվության համակարգ։ Ամերիկայի առևտրի պալատը Հայաստանում, որպես առաջատար բիզնես ասոցիացիա, իր անդամ կազմակերպությունների և մասնավոր հատվածի մյուս գործընկերների հետ համատեղ, նախաձեռնել է Հայաստանում փաթեթավորման թափոնների կայուն կառավարմանն ուղղված գործընթաց։
Շվեդիայի կողմից ֆինանսավորվող և Հայաստանի ամերիկյան համալսարանի (ՀԱՀ) Յակոբեան բնապահպանական կենտրոնի կողմից իրականացվող «Հայաստանում թափոնների կառավարման քաղաքականություն» ծրագրի աջակցությամբ, Ամերիկայի առևտրի պալատը սկսել է Արտադրողի պատասխանատվության կազմակերպության (ԱՊԿ) հիմնադրումը, որը կհամակարգի երկրում գոյացող փաթեթավորման թափոնների կայուն կառավարումը։ ԱՊԿ-ի հիմնադրման գործընթացի շրջանակներում իրականացվում է պիլոտային ծրագիր, որը մեծապես կօժանդակի ԱԸՊ օրենսդրության մշակմանը։ ՀՀ տարածքային կառավարման և ենթակառուցվածքների նախարարության առաջարկով պիլոտային ծրագիրը կիրականացվի Կոտայքի մարզի Հրազդանի համայնքում։
Թափոնների կայուն կառավարման պիլոտային ծրագիրը ֆինանսավորվում է 3 կազմակերպությունների կողմից. «Կոկա-կոլա Հելլենիկ Արմենիա» ընկերություն, «Ջերմուկ Ինթերնեյշնլ Պեպսի-կոլա Բոթլեր» ընկերություն և «Երևանի կոնյակի գործարան» ընկերություն։
Միևնույն ժամանակ, ԱԱՊՀ Կայուն զարգացման հանձնաժողովը համաձայնություն է ձեռք բերել Հայաստանում ԵՄ պատվիրակության հետ, որի շրջանակում միջազգային փորձագետը աջակցություն կտրամադրի պիլոտային ծրագրի հիմնադիր անդամ-կազմակերպություններին պիլոտային ծրագրի իրականացման ընթացքում։
ԱԱՊՀ-ն առաջատար բիզնես ասոցիացիա է, որը Հայաստանում հիմնադրվել է 2000թ. և ներկայումս ներկայացնում է Հայաստանի տնտեսության գրեթե բոլոր ճյուղերում գործող ավելի քան 180 տեղական և օտարերկրյա փոքր, միջին և խոշոր ընկերությունների շահերը: Կազմակերպության առաքելությունն է խթանել արտաքին և ներքին ներդրումների իրականացումը Հայաստանում և խրախուսել բիզնեսի համար առավել նպաստավոր միջավայրի ձևավորմանը:
Մեկնաբանություն