ԵԱՏՄ շրջանակում բժշկական արտադրատեսակների գրանցման ժամկետը 3 տարով կերկարաձգվի

Հայաստանի Հանրապետությունում բժշկական արտադրատեսակները մինչ այժմ չեն գրանցվում համապատասխան ենթաօրենսդրական ակտերի բացակայության պատճառով։

Կառավարությունն իր այսօրվա՝ դեկտեմբերի 18–ի նիստում որոշում կայացրեց, որով Եվրասիական տնտեսական միության շրջանակում անդամ երկրների ազգային օրենսդրություններով բժշկական արտադրատեսակների գրանցման ժամկետը կերկարաձգվի մինչև 2028 թվականը։

Գործող համաձայնագրով ԵԱՏՄ անդամ երկրների ազգային օրենսդրություններով բժշկական արտադրատեսակների գրանցումը հնարավոր է մինչև 2025 թվականի դեկտեմբերի 31–ը:

«Հայաստանի Հանրապետությունում բժշկական արտադրատեսակները մինչ այժմ չեն գրանցվում համապատասխան ենթաօրենսդրական ակտերի բացակայության պատճառով»,– ասված է որոշման հիմնավորման մեջ:

Նշվում է, որ ժամկետի երկարաձգումը պայմանավորված է ԵԱՏՄ բժշկական արտադրատեսակների ընդհանուր շուկայի գործունեության վերաբերյալ չլուծված խնդիրների առկայության, բժշկական արտադրատեսակների ընդհանուր շուկայի զարգացման հայեցակարգի չընդունման և բժշկական արտադրատեսակների գրանցման ազգային կանոնների պահպանումը պահանջող շարունակական տնտեսական իրավիճակի պատճառով: