Ամերիկացի միլիարդատեր Իլոն Մասկը վաճառել է Tesla-ի շուրջ 4 միլիարդ դոլար արժողությամբ բաժնետոմսերը Twitter-ը գնելու համաձայնությունից հետո։
Այս մասին հաղորդում է CNBC-ն ՝ հղում անելով փաստաթղթերին, որոնք ներկայացվել են ԱՄՆ Արժեթղթերի և բորսաների հանձնաժողով (SEC): Նրանք ասում են, որ Մասկը վաճառել է մոտ 4,4 միլիոն բաժնետոմս ապրիլի 26-ին և 27-ին, ընդ որում վաճառքի մեծ մասը տեղի է ունեցել ապրիլի 26-ին: Այդ օրը Մասկի կողմից Twitter-ի ձեռքբերման մասին տեղեկատվության ֆոնին Tesla-ի բաժնետոմսերը Nasdaq բորսայում կորցրեցին 12,18%, ինչը նվազեցրեց ընկերության կապիտալիզացիան մոտ 126 միլիարդ դոլարով:
Բաժնետոմսերի վաճառքի բացահայտումից հետո Մասկը թվիթերում գրել է, որ «այսօրվանից հետո Tesla-ի այլ բաժնետոմսեր վաճառելու պլաններ չունի»: Մասկը Twitter-ն առաջարկել էր գնել դեռ ապրիլի կեսերին մեկ բաժնետոմսի դիմաց 54,2 դոլարով: Արդյունքում ձեռնարկատերը համաձայնել է գնել սոցցանցը 44 մլրդ դոլարով, միևնույն ժամանակ հրապարակվել է գործարքի պլան, ըստ որի Morgan Stanley-ն 12,5 մլրդ դոլարի մարժա վարկ է հաստատել Մասկին ՝ ապահովված սեփական Tesla-ի բաժնետոմսերով։
Բացի Morgan Stanley-ից, ցուցակում կային ևս մի քանի բանկեր, և Մասկն ինքը պատրաստ էր տրամադրել 21 միլիարդ դոլար, առանց հստակեցնելու, թե որտեղից կգտնի այդ գումարը։ Tesla-ի ներդրողները մտավախություն ունեին, որ նա ստիպված կլինի օգտագործել Tesla-ի բաժնետոմսերը որպես գրավ ՝ Twitter-ը գնելու համար:
